Charter Document - 02220012

Je Richars diz Martins de Pouloigney faiz savoir à touz ceuz qui verront et orront cex presentes lettres que je por moi et pour Blainchon ma fome et pour les nostres ai pris et tiegne en fié ligement dou noble baron et saige mons Jehan de Chalon seignor d'Arlay pour lui et pour les siens perpetuelment nostre bois de Jarraise et tout quanque nous avons au territoire de Jarraisse en prez en champs en bois et em plains et en toutes autres choses et nostre four ausi à Salins en la rue de Malpertuis Et je Blainchons feme doudit Richart de ma bonne volenté et sapne me suis loée consentie et outroié à cele reprise doudit fié que lidiz Richars mez mariz a faite por nous et por les nostres des choses dessusdites en la main doudit noble baron et avons promis et convent nous lidiz Richars et Blanchons sa fome par nostre sairement donné sur sainz ewangiles touchiez corporelment lezdites choses tenir et garantir et faire tenir em pais audit noble baron et es siens permaignablement contre touz Et la reprise doudit fié nos por nous et por les nostres avons fait en la main doudit noble baron por lui et por les suens et por les benefices graces et courtoisies qu'il nos a faites dexquex nous nous tenons mout bien apaiez En tesmoignage de laquel chose obliganz nous et noz biens et noz hoirs por ce fait tenir et garder fermement sauz la jurisdiction de mon chier et redouté seignour le roy de France nos avons prié et fait mettre en ces lettres son seel douquel l'on use à Pouloingney Donné l'an de grace [courrant] par mil CCC ou mois de mars