Charter Document - 02220011

Je Poincet d'Arlay fiz çà en arrier mons Perron d'Arlay chevalier faiz savoir à touz ceux qui verront et orront cex presentes lettres que je reconnois que je tiengne de mon redouté seignor mons Jehan de Chalon seignour d'Arlay en fié et en chasement ligement mez maisons assizes à Arlay delez la maison ez enfanz Gautier d'Arlay d'une part et la maison mons Guion Le Bois d'Arlay d'autre item le meiz Estevenon Bulenin d'Arlay ensamble lez appendises d'iceluy item le meiz à Baul de Saint Germain emsamble lez appendises d'icelui item le meiz Vyenot Becelin emsamble les appendices d'iceluy item la vigne qui siet derier mezdites maisons d'Arlay delez la vigne ez hoirs mons Jehan Le Galois d'Arlay d'une part et la Noete d'autre item trois jornaus de terre arable qui sient ez Lonz Champs item une piece de terre arable et un curtil qui siet à Vincenz item tout le fié que Chote ma tante tient à Arlay de moi et generalment toutes lez choses que je tiegne et doi tenir dedenz le cors dou chastelerie d'Arlay quelles qu'elles soient ne en demenuere ne en fié soient de par mon pere ou de par Guinet mon oncle en quelque maniere que elles m'aviegnent doignent avenir ne puissent En tesmoingnage de laquel chose j'ai requis le seel de religieuse personne et honeste don Guillaume par la grace de Deu humile abbé de Balerne estre posez en ces presentes Faites l'an Nostre Signour courrant par mil douz cenz octante et sept ou mois de fevriel