Charter Document - 02220010

Je Hugues sire de Ranz fais savoir à touz ceuz qui verront ces presentes letres que comme je tenisse en fié lige dou noble baron Jehan çà en arrier conte de Borgoigne et signor de Salins le chastel de Poupet tout et le bourc et les appartenances toutes et lez appendisses et je par le commandement adit Jehan an soie entrez en l'omage lige à la noble dame Lore femme çà en arrier doudit conte doudit chastel de Poupet et dou borc et des appartenances sauve la feautey le conte de Borgoigne cui je suis hons liges d'autre fié et je lidiz Hugues aie baillié et delivré à Poinçart mon fil ledit chastel et toutes les apartenances et lidiz Poinçarz en fust entrez en l'omage lige de ladite Lore par le commandement audit Jehan conte et par ma volenté et après come mess Jehans de Belewevre sires de Bozjohan fust entrez oudit chastel de Poupet et le tenist à force contre ma volenté et la volenté adit Poinçart je et lidiz Poinçars en requesimes ladite dame et Jehan son fil que il lidit chastel nous aidissient à recovrer et à delivrer comme leur fié lige liquel l'ont fait ainsi com ils deurent et ont recouvré ledit chastel à force de siege à lour cost et à lour despens et le nos ont rendut et delivré Et je lidiz Poinçars cui lidiz chastiaus est et delivrez et bailliez reconnois toutes les devantdites choses ainsi estre et par la volenté à ladite Lore en suis entrez en l'ommage lige audit Jehan son fil deudit chastel et des appartenances toutes sauve la feauté à ladite Lore à son temps tant soulement En tesmoignage desquex choses je lidiz Hugues sire de Rans ai mis mon seel pendant en cez presentes letres Et je lidiz Poinçars por ce que je n'avoie seel ai fait à metre en ces presentes letres le seel le noble baron Guion de Ranz signour de Roches mon oncle le seel Hugon de Monferrant signour de Toraise et le seel à chapitre de Saint Michiel de Salins Ce fust fait le jour de feste seint George l'an Nostre Signour qui courroit par mil et dous cens et septante et quatre