Charter Document - 02220008
| Charter Number: | 02220008 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Confirmation |
| Date: | 1299 |
| Date type: | Internal, A.D. |
| Resource Link(s): |
Patrimoine numérisé de Besançon - MS Droz 21 - Tome 1 (p19) |
Charter:
Je Henriz diz de Bleterans chevaliers d'Arlay faiz savoir à touz ceuz qui verront et orront cez presentes letres que j'ai pris en fié lige pour moi et pour mes hoirs de mon très bien amé et redouté seignour mons Jehan de Chalon seignour d'Arlay Thietart fil Poinçart de Joienz et Jaquet ausi de Joienz mez hommes emsamble leurs mez et lez apertenances et conquises ausi pour aucuns biensfaiz que mez bien amez sires m'a fait et que je ai heu de luy et especialment pour treze livres et douz souz d'estevenans que je ai eues et receues de mondit amé seignour en bons deniers nombrez et m'en suis tenus por bien paiez prometans por moi et por mez hoirs et sus l'obligation de mez biens et par mon sairement donné corporelment suz sains ewangiles cest fait et ceste chose tenir et poursuigre et non mie aler encontre en nulle maniere En tesmoing de laquel chose je ai requis et fait metre en cez letres lez seauz de bonnes personnes et honnestes mons Humbert priour de L'Estele mons Humbert Le Lousche curé de cest meesme leu et mons Pierre Le Bois curé d'Arlay C'est fait et donné l'an de grace [courrant] par MCC nonante et nuef ou mois d'aost