Charter Document - 02220007

Nous Hugues de Vyenne sires de Paigney faisons savoir à touz que nous tenons en fié por nos et por noz petiz freres de par pere d'ome tuteres d'iceux de noble baron mons Jehan de Chalon seignour d'Arlay par ensi com nostre bien amez sires et peres çai en arrier Phelippes de Vyenne sire de Paingney lou tenoit ou tenir devoit dou devantdit mons d'Arlay lou chastel de Pymont et lez appendisses et apartenances doudit chastel et çou que nous avons et tenir poons et devons à Laon le Saunier et ez apartenances et ez appendises de ladite vile en quelque chose que ce soient en hommes en prez en champs en viegnes en bois en rivieres en seignories en banz en justices et en toutes autres choses que nous avons poons et devons avoir en ladicte vile et ez apendises et ez apartenances en demeneures en fiez et rirefiez et en toutes autres ventes et valours quex que elles soient et quanque nous y puet escheoir en toutes manieres saul le droit de la menoie se faite y estoit et les choses que nous y avons aquis puis le fié fait adit mons Jehan segnour d'Arlay lezquez ne estoient de l'eritage mondit pere ne dou nostre ne dou fié ne dou rerefié que il tenoit doudit mons Jehan seignor d'Arlay que nous retenons à nos Et encor tenons en nom com dessus doudit mons d'Arlay le fié que Estienes çà en arrier sires de Roiffé soloit tenir de nostre devantdit pere et por consequent tenir l'en doit on en nom com dessus de nous c'est assavoir Crilley et Roiffey excepté Loyselou quel lidiz messire d'Arlay ai quitté à toutes les autres choses que lidiz Estenes ou sui hoir tignent ou tenir doivent de nous quelque part que elles soient et quezque choses que ceu soient soit en fiez ou rerefiez ou en demenuires Et encor tenons ou non comme dessus doudit mons d'Arlay le fié de Mugnet et la garde Balerne et toutes les choses que audit fié de Mugnet appartienent et appendent en demenuires en fiez ou rerefiez et en toutes autres choses Et avons encore et tenons doudit mons d'Arlay en fié le fié de Belregart et de Virechastel et lou fié de Desnenz et quanque il apartient es fiez dezdiz lieuz que l'on tient de nous soit en demenueres en fiez en rerefiez Et de toutes ces choses dessusdites sommes nous entrez en son homage ou nom comme dessus sauve la feauté le duc et le conte de Borgoigne noz seignors Et prometons lealment en bone foi en non comme dessus dit adit mons d'Arlay garantir et maintenir les devantdites choses et lez devantdit fiez ensi comme droiz et raisons le portera Et nos devons tenir enver mons ledit mons d'Arlay comme enver mon bon signor et il ver nos comme ver son homme sauf ce que il n'est tenus de nos aidier contre noble baron Jehan de Chalon conte d'Aucerre se il y avoit guerre en son chief se il ne venoit de son bon grey ne nos ne sommes tenus aussi d'aidier adit mons d'Arlay contre les hoirs de noble baron mons Henry de Paingny signour çà en arrier de Sainte Crois se il avoient guerre en lour chief se de nostre bon grey ne venoit Et prometons en non comme dessus encour toutes ces convenances ensi com elles sont devisées tenir et garder fermement à touzjours mais et que nos ne vendrons encontre ne ferons venir per autrui taisiblement ne expressement Et renonçons par nostre foy donnée suz seintes ewangiles à touz drois et à toutes exceptions et raisons que aidier porroient et valoir à nous ou as nostres à venir contre ces convenances et adit M d'Arlay et es siens nuire En tesmoignage de laquel chose nos li devant dit Hugues de Vienne sires de Paingny en non comme dessus avons mis nostre seel pendant en ces presentes letres faites et données l'an de Nostre Signour courrant par MCCC et quatre le lundi après la quinzene de Pasques ou mois d'avril