Charter Document - 02220004
| Charter Number: | 02220004 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Confirmation |
| Date: | 1304 |
| Date type: | Internal, A.D., Feast |
| Resource Link(s): |
Patrimoine numérisé de Besançon - MS Droz 21 - Tome 1 (p.9) |
Charter:
Nous Robers dux de Bourgoigne faisons savoir à touz que nos donnons et avons donné à nostre amé et feaul frere mons Jehan de Chalon seignor d'Arlay por don neant rapelable fait entre les viz por lui et por les siens perpetuelemant en accroissance dou fié que il tient de nos et doit tenir et de noz hoirs et dez heanz cause de nos ou de eauz le fié que nobles hons messires Hugues de Vienne nostre amez et feauz cousins tient de nos par raison dou chastel de Mirebel de la chastelenie et des apertenances d'iceluy se il plait adit mons Hugue lequel chastel la chastelenie et lez apertenances nobles hons messires Jehans de Vyenne nostre amez cousins tient et doit tenir doudit mons Hugue toutevoie sauf en toutes choses audit mons Hugue le droit de son fié contre ledit mons Johan de Vienne et les suens quant ez choses dessusdites Et est assavoir que por raison dezdites choses ensamble ledit don fait de nos audit mons Jehan de Chalon en la maniere que dessus lidiz messires Jehans est tenuz à nouz et nos a promis em bonne foi por luy et pour les suens et pour lez heanz cause de luy ou de eaus entrer en nostre foy ou en la foy de noz hoirs ou dez heanz cause de nous ou de eaus et faire pour raison doudit fié servise bon et convenable à noz ou es nouz se mestier est En tesmoignage de laquel chose nos avons fait metre nostre grant seel en cez letres faites et données à Pont de Chairenton le lundi après lez III semaines de Pasques l'an de grace mil CCC et quatre