Charter Document - 02220002

Nous Oedes sires de Monferrant faisons savoir à touz ceauz qui cez letres verront que nos avons repris en fié et en chasement de noble baron mons Jehan de Chalon seignour d'Arlay le fié que li sires de Monferrant tenoit et devoit tenir de noble baron Jehan çà en arier conte de Chalon et pere dudit mons Jehan seignor d'Arlay par ainsi com lidiz sires de Monferrant le tenoit et devoit tenir doudit noble conte de Chalon dessus nommé et en acroissement doudit fié nos por le bienfait que lidiz Jehans sires d'Arlay nos a fait avons repris en fié et en chasement tout le fié que messires Girars seignor d'Arlay tient de nos et doit tenir en quelque maniere que il soit douquel fié nos somes entrez en l'omage et en la foi deu devantdit monsignor Jehan de Chalon seignour d'Arlay En tesmoignage de laquele chose nous avons mis nostre grant seel en cez letres et por plus grant fermetey nos avons prié et requis religiouse personne frere Guillaume abbé de Balerne que hi mete son seel en ces letres Faites et données en l'an qui corroit par mil CC nonante et douz la veille de feste saint Andrey l'apostre