Charter Document - 02220001

Je Rouz cuens et sires de Nuefchastel suz le Lac en la dyocise de Lausanne fais savoir à touz que je confesse et reconnois que je tien en fié lige et en chasemant devant touz autres signours de haut baron puissant mons Jehan de Chalon seignour d'Arlay toutes les choses ci après escriptes et nommées Premieremant quanque je ai et dois avoir ou val de Niriul dez le ruy de Vauz en amont à Nuefchastel et mon chastel dou Pont de Tiele emsamble sez apartenances toutes en viles en justices en bois ou en prez en champs en terre et en toutes autres choses quelles qu'elles soient item mon chastel de Boudri emsamble sa chastelenie et toutes sez appartenances en viles en justises en aigues et en toutes autres choses quelles qu'elles soient item mon chastel de Rochefort emsamble sa chastelenie et toutes sez apartenances en viles en justices en bois en aigues en terres et en toutes autres choses item mon chastel de Valmercueil emsamble totes ses apartenances en viles em bois en rivieres en aigues en terre et en totes autres choses item la vile de Boudiviller et sez apartenances et quanque je ai et dois avoir ou val de Ruil item le val de Valtravert emsamble toutes sez apartenances en viles en aigues en bois en terre et en totes autres choses quelles qu'elles soient que je ay ne puis avoir ne dois excepté le paage la chace et les homes que l'on apele Roiez lesquelles choses sont ausi de son fié par raison de l'Empire et par le commandemant au roy Roul d'Alemaingne item mon chastel et ma vile de Nuefchastel la baronnie la justise et toutes ses apartenances en terre en bois en prez en champs en vignes en aigues en ventes en paages et en toutes autres choses que je hi ai ne puis ne dois avoir lesquex choses je tieng dou fié devant dit mons Jehan de Chalon par raison de l'Empire et par le commandement à roy Roul d'Alemaigne excepté de toutes les choses dessusdites lez dymes de blef et de vin que je tien ou que on tient de moy lezquez je tien ou fié Nostre Dame de Leusanne Et est assavoir que mesdiz sires et si hoirs moy et mes hoirs doient aidier contre touz hommes tandiz que je ou my hoirs volent faire droit et prandre par lui ou par ses hoirs et li doi aidier et my hoirs as siens ausi contre touz Et est assavoir que ceste feauté ceste ligeté et cest homage que je ai fait à mondit signor je l'ai fait ez us et ez costumes de Bourgoigne en tel forme que se je n'avoie hoir masle que li une de mes filles ou dez filles de mez hoirs ne preist repreist ledit fié et tenist ansi com je l'ai repriz et tien dou devantdit monsignor Jehan de Chalon et en la maniere repreissent de luy que je en ai repriz Et après est assavoir que mezdiz sires me doit porter garant enver l'emparaour se ensi estoit que il vossit que je repreisse de l'Empire le fié qui muet de lui et est assavoir la baronnie de Nuefchaitel laquele est dou fié mon signour par raison de l'Empire et par le commandemant au roy Raul d'Alemaigne ensi comme il est dessus dit emsamble ses apartenances en vantes en paages en court d'aigues et en bois et en haute justise et em basse dure et doit dez en Fournel prez de Liesrety tant que à ruissel de la Lance et tant que à la combete de Mie Jour en lonc et dure en large dez la preire de Villar en Villier tant que à la Pierrefeu outre le val de Ruil En tesmoignaige de laquel chose je ai mis mon seel en cez presentes lettres et ai priet à religiouse personne et honeste frere Jaique priour en cel temps de Roumemostier que il meist son seel en ces presentes lettres Et je freres Jaiques priour en cel temps de Roumemostier à la priere dou devantdit monsignour Roul signour de Nuelchastel ay mis mon seel propre en ces presentes lettres qui furent faites et données à Rochejan l'an de grace Nostre Signour MCCC et XI le vanredi devant la saint Jehan Baptiste ou mois de jung