Charter Document - 02195505
| Charter Number: | 02195505 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Dispute |
| Date: | 1300 |
| Date type: | Assigned |
| Resource Link(s): |
CCE: cartae cluniacenses electronicae |
Charter:
Petit in jure frater Jacobus procurator et sindicus domini abbatis et conventus Cluniacensis nomine et ex parte dictorum abbatis et conventus quod cum quidam clericus Guichardus nomine quondam filius Blancheti Ceci in tantum deliquisset et tot mala perpetrasset in villa Cluniacensi et extra propter contumaciam suam et rebellionem decanus qui tunc tempore erat de consilio peritorum fecit saisire bona sua et specialiter quamdam domum sitam in vico Sancti Marcelli super Gronam in qua domo dictus decanus de familia sua custodes posuit et ordinavit donec veniret ad parendum juri coram ipso quo facto burgenses et communitas ville jure non requisito loco et tempore competenti dictam domum invaserunt et impetum unanimiter fecerunt et familiam dicti decani et monachos et servientes domini abbatis verberaverunt et aliquos ipsorum usque ad mortem vulneraverunt Et hoc petit dictus procurator nomine supradictorum abbatis et conventus sibi emendari Item dicit dictus procurator quod cum dictus decanus qui tunc temporis erat hoc audisset et quod tale facinus perpetratum esset de consilio prioris et conventus Cluniacensis citavit burgenses meliores et ditiores ut quod male actum fuerat more solito emendarent et facerent emendari Illi vero Deum minime timentes seditionem in villa moverunt ad presentiam decani non sicut burgenses set sicut hostes armati cum gladiis arbalistis januam magnam intraverunt et eam violenter occupaverunt quod de jure facere non poterant nec debebant nec etiam decano predicto responsionem fecerunt prout facere debuerunt immo contumaciter recesserunt et quod pejus est cum aliqui monachi de ecclesia et specialiter domnus Guillelmus socius camerarii vellent claudere portam que dicitur de Satmo dicti burgenses eam claudere non permiserunt immo in monachos manus violentas injecerunt et eos usque ad claustrum violenter fugaverunt et dictam portam et muros ecclesie cum arbalistis et armis multiplicibus occupaverunt Et hoc petit memoratus procurator nomine supradictorum abbatis et conventus quod dicti burgenses et ville communitas secondum quod jura clamant de seditione facta in civitate puniri debeant et pena eis debita infligatur Item dicit dictus procurator quod cum quidam invasores et predones in territorio Cluniacensi fuissent et usque ad portas ville cucurrissent dictus abbas et cum eo camerarius et decanus de villa exiverunt et per villam preconizari fecerunt ut omnes dictos abbatem et camerarium et decanum cum armis sequerentur qui burgenses non fecerunt secundum quod eis fuerat imperatum Et hoc petit sepe dictus procurator nomine supradictorum abbatis et conventus salvo jure addendi mutandi et corrigendi