Charter Document - 02195489

Universis presentes litteras inspecturis nos Renaudus Dei gratia humilis abbas Balmensis ejusque loci Deo devotus conventus et priores Balmensi ecclesie immediate subditi inferius nominati salutem in Domino Noveritis quod cum jam dudum inter nos et reverendum in Christo patrem nostrum dominum Bertrandum Dei gratia abbatem Cluniacensem ejusdemque loci sacrosanctum conventum super infrascriptis articulis videlicet super vicesima quam a nobis et a rectoribus ecclesiarum parrochialium nostrarum de annis undecim necnon super visitatione et correctione quas a nobis tam in Balmensi monasterio quam in membris ejusdem petebant dicti domini abbas et conventus Cluniacenses et dicebant sibi competere et habere et super quibusdam interdictorum excommunicationum et aggravacionum sentenciis in nos et Balmense monasterium a dicto domino abbate Cluniacensi et a judicibus et executoribus Sedis apostolice occasione rebellionis contumacie nostre et manifeste offense ut dicebant dicti domnus abbas et conventus rite et legitime promulgatis et super captione et de temptacione quorumdam monachorum nostrorum Balmensium quos eorum culpis exigentibus manifestis ut asserebant dicti abbas et conventus Cluniacenses detinebant carceri mancipatos rursus super captione quorumdam victualium priorum et monachorum Cluniacensis ordinis venientium tunc temporis ad Cluniacense capitulum generale de qua siquidem captione tam nos quam monachos nostros Balmenses una cum aliquibus amicis dictorum monachorum Balmensium penes Cluniaco ut dictum est detemptorum dicebant dicti abbas et conventus Cluniacenses conscios et culpabiles extitisse et multa spolia tam ad nos quam ad alios occasione hujusmodi devenisse Item et super dampnis deperditis expensis missionibus interesse et custibus variis et diversis que dicti domnus abbas et conventus Cluniacenses asserebant se fecisse et incurrisse occasione omnium predictorum querela seu discordia extiterit diucius agitata tandem amicis communibus intervenientibus hinc et inde de omnibus et singulis supradictis concordatum extitit in hunc modum videlicet quod ex nunc ante omnia nos abbas et conventus Balmenses prioresque inferius nominati renunciamus omnibus provocationibus appellationibus impetrationibus et processibus pro nobis hactenus factis et habitis per quosque contra domnum abbatem et ecclesiam Cluniacensem matrem nostram Volumus et etiam consentimus promittimusque in posterum observare quod patres nostri et domni qui pro tempore erunt abbates Cluniacenses nomine Cluniacensis ecclesie visitationem et correctionem perpetuo habeant in Balmensi monasterio in prioratibusque eidem monasterio immediate subjectis et quod simus eidem subjecti et subditi illamque subjectionem et jura in nobis et locis nostris habeant que olim per compositiones hactenus habitas extitit concordata quas siquidem compositiones expresse approbamus et per has nostras presentes litteras confirmamus quarum compositionum tenor in quodam instrumento publico super presenti compositione confecto signoque Andree de Kadrellis clerici auctoritate apostolica publici notarii signato scripto et subscripto plenius continetur Pro dicta autem vicezima quam eisdem domnis abbati et conventui debere jam publice confitemur et pro damnis interesse missionibus expensis et gustibus antedictis tenemur et obligamus nos successoresque nostros nostra eorumque bona presentia et futura ad solvendum dicto domno abbati Cluniacensi nomine Cluniacensis ecclesie apud Cluniacum duo milia librarum parvorum Turonensium ad terminos infrascriptos videlicet ducentas libras parvorum Turonensium in proximo futuro Cluniacensi capitulo generali et sic deinceps annis singulis faciendo quousque dicta pecunia fuerit integraliter persoluta ita quod si nos defficerimus in solvendo in toto vel in parte terminis supradictis viginti solidos parvorum Turonensium nomine pene eidem domno abbati Cluniacensi solvere tenemur pro qualibet septimana una cum dampnis deperditis et expensis simplici assertioni domni abbatis Cluniacensis qui pro tempore fuerit aut juramento procuratoris Cluniacensis ecclesie stabitur et credetur et sine alia probatione facienda poteruntque bona nostra predicta ad dicti domni abbatis Cluniacensis qui pro tempore fuerit requisitionem pro dicto debito pena dampnis et interesse per judicem secularem in cujus districtu bona invenientur predicta arrestare et capi tamdiuque teneri et sine probatione alia expletari quousque dicto domno abbati Cluniacensi de predicta pecunie summa una cum expensis dampnis et deperditis fuerit plenarie satisfactum Pro bonis dictarum victualium priorum et monachorum Cluniacensis ordinis captorum ut superius est expressum dampnis deperditis et interesse eorum usque ad sommam centum librarum Turonensium parvorum salva moderatione priorum claustralis Cluniacensis et de Longo Ponte si eis videbitur facienda Richardus de Pologniaco domicellus qui eosdem monachos per se vel per alium domno abbati Cluniacensi satisfacere tenebitur vel cavere condigne de satisfaciendo eidem antequam Gerardus quondam prior de Ledone frater dicti domicelli de prisione dicti domni abbatis debeat liberari dictusque Richardus qui monachos predictos una cum suis complicibus cepisse dicitur obligaciones fide jussorias vel alias quas[cum]que quas habet in dictis monachis amicis vel parentibus eorumdem ante omnia eisdem remittere tenebitur et quittare Dictusque Girardus quondam prior de Ledone et Johannes de Pontailliaco Balmenses monachi nec in ordine Cluniacensi nec alibi de cetero poterunt provisionem aliquam obtinere nisi cum eis per domnum abbatem Cluniacensem fuerit dispensatum nec etiam dictus Gerardus in electione Balmensi vocem poterit obtinere Idem dictus Gerardus de prisione dicti domni abbatis Cluniacensis liberatus in claustro Cluniacensi retinebitur quousque predictum Richardum fratrem suum qui dictos priores et monachos cepit et capi ceteris procuravit ad prisionem domni abbatis Cluniacensis venire procuraverit ad emendandum injuriam captionis hujusmodi monachorum Insuper nos dicti abbas et conventus prioresque Balmenses tenemur et ad hec volumus esse obligati quod Balmenses monachi qui eidem domno abbati Cluniacensi ad monasterium Balmense et ejus membra jam dudum ad visitandum et corrigendum inibi veniendo violenter et cum armis etiam restiterunt ad prisionem dicti domni abbatis Cluniacensis venient penam pro tanto excessu merito recepturi Quodsi nos in articulo hujusmodi extiterimus negligentes vel super hoc non fecerimus posse nostrum ad centum marchas argenti occasione negligentie seu voluntatis hujusmodi nomine pene tunc temporis eisdem domnis abbati et conventui Cluniacensi teneri et esse volumus obligati ad quas centum marchas argenti solvendas per eum modum per quem nos successores bonaque nostra et eorum super articulo vicesime dampnorum expensarum interesse deperditorum et custium de quibus mencio in precedentibus fuerit facta obligamus Simili modo volumus et consentimus affici et distringi quod si debitum nostrum fecerimus in hoc casu nec monachi predicti aliter possint cogi ad dictam prisionem venire obligamus nos bonaque nostra sub pena centum marcharum predicto modo quo dictum est persolvenda quod in perpetuum pene nomine dictos monachos non recipiemus nec in Balmensi monasterio nec in membris nec eos in aliquo sustinebimus nec eisdem favebamus quoquomodo summas quoque quas in dictos monachos domnus abbas promulgavit et promulgabit etiam in futurum servabimus et faciemus etiam a nostris subditis observari Predicta autem omnia et singula prout superius sunt expressa promittimus attendere et perpetuo inviolabiliter observare Renunciamus autem in hoc facto omni actioni et exceptioni doli metus et in factum condicioni sine causa vel ex injusta causa petitioni oblationi libelli copie presencium et transcripto fori privilegio beneficio restitutionis in integrum et omni exceptioni lesionis et deceptionis privilegio crucis assumpte et etiam assumende omnique juri in favorem ecclesie introducto omnibusque litteris impetratis seu et impetrandis et omnibus exceptionibus dilataris et peremptoriis et omnibus privilegiis graciis et indulgentiis apostolicis regalibus et imperialis concessis et etiam concedendis jurique dicenti subicientem se aliene jurisdictioni ante litem contestatam posse penitere omnique juri canonico consuetudinario et civili et omnibus aliis exceptionibus juris et facti que possent cogitari vel exprimi ab aliquo sapiente quibus expressis aut pro expressis habitis et enunciatis renunciamus specialiter et expresse juri etiam dicenti generalem renunciationem non valere et in aliis omnibus auxiliis per que possent predicta seu aliquid de predictis infringi aut etiam modo aliquo impediri Et si forte [quod absit] in futurum contra premissa vel aliquid premissorum nos vel successores venire contigerit volumus et concedimus quod nobis coram quocumque judice et in omni curia vox et totalis audientia denegetur In quorum omnium robur firmitatem et testimonium nos prefatus abbas et conventus Balmenses necnon de Joa de Dola de Sancto Lauthano de Pologniaco de Jusono monasterio Bisuntinensi de Monasterio in Bressia de Mostereto de Bonevauz de Capella de Ceys de Sancto Reneberto de la Fraite prioratuum priores sigilla nostra presentibus litteris duximus apponenda Datum et actum in Balmensi capitulo die martis post octabas Pentecostes anno Domini millesimo trecentesimo