Charter Document - 02195487

In nomine Domini Amen Anno ejusdem MCCCIII idus maii videlicet die jovis post festum beati Nicholai indictione XIII pontificatus domini Bonifacii pape octavi anno sexto per presens publicum instrumentum cunctis appareat evidenter quod in presentia mis Andree de Kadrellis clerici sacrosancte Romane ecclesie publici auctoritate notarii et testium subscriptorum constituti viri religiosi de Joa et de Dola prioratuum priores necnon prior monasterii Balmensis et frater Theobaldus de Lisla camerarius dicti monasterii Balmensis Bisuntinensis dyocesis venerabili et religioso viro domino priori claustrali Cluniacensi humiliter et devote supplicarunt quod cum ipsi essent et diu fuissent excommunicationum et aggravationum plurium sentenciis innodati tam per reverendum in Christo patrem dominum B[ertrandum] Dei gratia abbatem Cluniacensem quam per executores vicesime que in toto Cluniacensi ordine a Sede apostolica Cluniacensi ecclesie est concessa pro dicta vicesima quam non solverant temporibus retroactis necnon pro eo quod inobedientes fuerant Cluniacensi ecclesie et rebelles unde petebant a predictis excommunicationum sentenciis humiliter se absolvi quia parati erant ut dicebant de predicta vicesima satisfacere domino abbati Cluniacensi tam de annis preteritis quam futuris et coram domino abbate Cluniacensi in omnibus et per omnia stare juri Appellationi etiam quam abbas et conventus Balmenses fecerant contra Cluniacensem ecclesiam super dicta vicesima non solvenda renunciaverant et in presenti quantum in eis erat renunciabant expresse et omnibus processibus et impetrationibus inde habitis et habendis Unde dicti priores de Joa de Dola et Balmensis monasterii et camerarius supradictus tactis sacrosanctis Dei evangeliis corporaliter prestito juramento promiserunt et juraverunt quod de cetero erunt tanquam subjecti Cluniacensi ecclesie et domino abbati Cluniacensi obedientes et ejus correctionem et visitationem recipient humiliter et devote et de dicta vicesima satisfacient quantum ipsos tangit ad terminos in compositionem que de novo inter Cluniacensem et Balmensem ecclesias est inita jam concessos Quod si abbas et conventus Balmensis compositionem predictam per eos tractatam atque preloqutam nollent servare vel ab eis in aliquo deviarent promiserunt dicti Balmenses monachi modo quo premissum est prestito juramento quod ipsi quantum in eis erit compositiones hujusmodi observabunt nec dictos abbatem et conventum Balmenses vel alios hujusmodi compositionem impugnantes sustinebunt neque eis favebunt sed eos in facto hujusmodi propugnabunt pro viribus et pro posse quibus promissionibus factis et prestitis juramentis dictus dominus prior claustralis Cluniacensis cui dictus reverendus pater dominus abbas Cluniacensis super hoc commiserat vices suas predictos priores et camerarium Balmenses monachos a predictis excommunicationum sentenciis absolvit eis salutarem penitentiam injungendo Actum suprascriptarum promissionum in logia hospicii Cluniacensis et dictarum excommunicationum absolucio in capella dicti hospicii anno et die quibus supra presentibus testibus videlicet venerabili patre domino Guillelmo abbate de Billerim Cisterciensis ordinis Bisuntinensis dyocesis magistro Hugone de Montemoreto magistro Johanne de Lafay magistris Bernardo Pelliparii Petro Carpentarii Bartholomeo de Castro et Guidone de Balma clericis et pluribus aliis clericis et laicis fidedignis ad premissa vocatis testibus et rogatis Ego vero predictus Andreas de Kadrellis clericus auctoritate apostolica publicus notarius qui presens interfui rogatus hoc presens publicum instrumentum manu propria scripsi et in formam publicam redegi et signo meo signavi