Charter Document - 02195477

Bonifacius Episcopus servus servorum Dei dilecto filio Abbati Monasterii sancti Benedicti de Divione Lingonensis Diocesis salutem et Apostolicam benedictionem Sua nobis dilecti filii Abbas et conventus Monasterii Cluniacensis ad Rom Ecclesiam nullo medio pertinentis Matisconensis Diocesis petitione monstrarunt quod cum idem Abbas ad quem visitatio correctio et reformatio Monasterii Balmensis ejusdem Ordinis Bisuntinen Diocesis et Prioratuum ejusdem Monasterii Balmensis ac personarum ipsorum Monasterii Balmensis et Prioratuum dicto Monasterio Cluniacensi subjectorum censuras Ecclesiasticas ac nonnulla alia in eisdem Monasterio Balmensi Prioratibus et personis exercere que spiritualis jurisdictionis existunt tam ex regularibus statutis ipsius Ordinis quam de antiqua et approbata consuetudine et hactenus observata a tempore cujus non extat memoria pertinere noscuntur ad predictum Monasterium Balmense ac de Sola et de Joha Prioratus ejusdem Monasterii Balmensis predicte Bisuntinensis Diocesis impensurus in eis visitationis Officium prout sibi competebat ex hujusmodi statutis et consuetudine accessisset quia Rainaudus Abbas et conventus dicti Monasterii Balmensis in ipso Monasterio ac Guillelmus de Sola et Gerardus de Joha Priores Prioratuum predictorum et Monachi Prioratuum eorumdem in eisdem Prioratibus eum ad visitandum admittere contumaciter recusarunt iidemque Priores necnon Richardus Cellerarius et Girardus Camerarius dicti Monasterii Balmensis contra eumdem Abbatem Cluniacensem spiritu rebellionis assumpto super hoc dicto Abbati Cluniacensi se precipue opponentes ac ausu nefario in eumdem Abbatem et familiares ipsius qui cum eo erant cum nonnullis Monachis dicti Monasterii Balmensis ac aliis eorum complicibus armis munitis nequiter irruentes eos contumeliosis verbis et aliis diversis injuriis afficere presumpserunt idem Abbas Cluniacensis in ipsos Abbatem Balmensem cellerarium Camerarium ac Priores Canonica monitione premissa excommunicationis et in Monasterium Balmense ac Prioratus predicta interdicti sententias exigente justitia promulgavit Verum ipsi Abbas Balmensis Cellerarius Camerarius et Priores necnon conventus Monasterii Balmensis et Monachi Prioratuum predictorum sententias ipsas damnabiliter contemnentes sustinuerunt per annum et amplius et adhuc sustinent animis induratis dictique Abbas Balmensis Cellerarius Camerarius et Priores sic ligati Divina Officia celebrare imo verius quantum in eis est profanare presumunt in animarum suarum periculum Ecclesiastice Discipline contemptum dictorum Abbatis et conventus Cluniacen prejudicium et scandalum plurimorum Quare prefati Abbas et conventus Cluniacensis nobis humiliter supplicarunt ut predictas excommunicationis et interdicti sententias Robur firmitatis debitum obtinere dictosque Abbatem Balmensem Cellerarium Camerarium et Priores puniri pro presumptione hujusmodi pena Canonica faceremus Quocirca discretioni tue de utriusque Partis Procuratorum assensu per Apostolica scripta mandamus quatinus sententias ipsas sicut rationabiliter sunt prolate facias auctoritate nostra usque ad satisfactionem condigna appellatione remota inviolabiliter observari Si vero iidem Abbas Balmensis Cellerarius Camerarius Priores et conventus eorumdem Monasterii Balmensis et Prioratuum Monachi dictas sententias posteaquam eas tibi fore constiterit rite latas per unum mensem pertinaciter tolerarint extunc ipsos Abbatem Balmensem Cellerarium Camerarium et Priores excommunicatos pulsatis campanis et candelis accensis Monasterium vero Balmense et Prioratus predicta Ecclesiastico interdicto supposita publice nuncies et per omnia loca in quibus expedire videris nunciari facias et eosdem Abbatem Balmensem Cellerarium Camerarium et Priores ab omnibus arctius evitari Super eo autem quod Abbas Balmensis Cellerarius Camerarius et Priores predicti Divina Officia dicuntur taliter celebrare quod Canonicum fuerit appellatione remota decernas faciasque quod decreveris per censuram Ecclesiasticam firmiter observari Datum Laterani XV Kalendas Martii Pontificatus nostri anno quinto