Charter Document - 02195476

Nos frater Guillelmus permissione divina humilis abbas Moysiacensis notum facimus universis presentes litteras inspecturis quod cum nos nuper fratri Raimundo de Bauro quondam abbati Lesatensi persuaserimus bona fide et apud eum quantum studiosius potuimus per nos et nostros institerimus consulendo ut appellationibus et provocationibus contra reverendum patrem nostrum domnum Bertrandum Dei gratia abbatem Cluniacensem ad Sedem apostolicam aut alibi ubicumque per eumdem fratrem Raymundum interpositis renunciaret omnino et dicti reverendi patris se supponeret voluntati dictusque frater Raymundus minus sano ductus consilio persuasioni nostre et consilio acquiescere vilipendens renunciare non curavit suis appellationibus et provocationibus memoratis ne tanta sua temeritas nobis et monasterio nostro Moysiacensi futuris posset impingi temporibus aut alias occasione hujusmodi nos et idem monasterium nostrum dampnum et periculum in posterum incurramus nos bona fide et sub voto religionis nostre necnon sub obedientie vinculo quo domno reverendo patri tenemur voluntarii et spontanei eidem reverendo abbati promittimus quod dicto fratri Raymundo exnunc in antea in dictis suis appellationibus seu provocationibus aut in earum qualicumque prosecutione seu in quibuscumque aliis tangentibus appellationes et provocationes predictas clam vel palam directe vel indirecte per nos aut nostros quoscumque non prestabimus prestari aut dari procurabimus aut quoquo modo consentiemus facto vel verbo patrocinium presidium consilium aut juvamen quin immo dictum fratrem Raymundum et suos fautores suosque adherentes contra eum sine apostolice Sedis et juris offensa non patiemur in dictis et consiliis impediemus et impediri totis viribus faciemus In quorum testimonium presentibus litteris sigillum nostrum duximus apponendum Datum apud Moyracum die sabbati post festum Purificationis beate Marie Virginis anno Domini millesimo ducentesimo nonagesimo octavo