Charter Document - 02195472
| Charter Number: | 02195472 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1298 |
| Date type: | Internal, Calendar, Papal |
| Resource Link(s): |
CCE: cartae cluniacenses electronicae |
Charter:
Bonifacius Episcopus servus servorum Dei dilecto filio Abbati Cluniacensi salutem et Apostolicam benedictionem Cum nuper dilectus filius Hugolinus de Valle Gravosa monachus Cluniacensis Decanus domus sancti Saturnini de Portu Cluniacensis Ordinis Uticensis Diocesis more devoti filii qui libenter patris supportat onera et ulciscitur injurias grata meditatione consideratis expensarum oneribus que occasione Schismaticorum Columnensium nostrorum et Ecclesie Romane rebellium ad quorum plectendam superbiam et nequitiam conterendam per hostiles processus et exercitus continue laboramus oportuit et oportebat nos et Ecclesiam ipsam ex necessitate subire decem millia Florenorum auri nomine tuo et conventus tui Cluniacensis et totius Cluniacensis Ordinis nobis in subsidium expensarum hujusmodi liberaliter obtulerit et persolverit per manus dilectorum filiorum Crati cambii et Guarenti Jacobi sociorum civium et mercatorum Florentinorum de societate Spinorum Florentinorum queque decem millia Florenorum dictus Hugolinus nomine quo supra de nostra speciali licentia mutuo receperit a Crato et Guarento predictis mutuantibus pro seipsis et pro Rogerio et Ranucio et Gerardo Hugonis ac Masco clarissimis eorum sociis de societate predicta prout in instrumento publico super hujusmodi mutuo confecto plenius dicitur contineri Nos attendentes quod onus divisum in partes facilius supportatur discretioni tue dividendi et imponendi particularis predictam pecunie summam per universos Abbates Priores seu alios Prelatos quocumque nomine censeantur et eorum Monasteria Prioratus et Loca Ordinis memorati ipsorumque conventus atque personas prout videris expedire ac eos et eorum quemlibet compellendi ad contribuendum tibi ac dicto conventui Cluniacensi in dicta pecunie quantitate necnon contradictores per censuram Ecclesiasticam appellatione postposita compescendi nonobstantibus si aliquibus a Sede Apostolica sit indultum quod interdici vel excommunicari nequeant aut suspendi per litteras dicte Sedis non facientes plenam et expressam de indulto hujusmodi mentionem liberam concedimus auctoritate presentium facultatem Datum Rome apud sanctum Petrum XVI Kalendas Augusti Pontificatus nostri anno quarto