Charter Document - 02195446

Galterus de Rans Remensis et Arnaldus de Cantalupo Agenensis canonici reverendorum patrum dominorum B Albanensis et S Penestrini episcoporum sacrosancte Romane ecclesie cardinalium capellani et nuncii universis ad quos presentes littere pervenerint salutem in Domino Cum prefati domini nostri pro quibusdam arduis negociis sibi ab apostolica Sede commissis nos ad Romanam curiam duxissent destinandos nobisque auctoritate apostolica sibi in hac parte commissa mandassent a prelatis et aliis personis ecclesiasticis exemptis et non exemptis que a nobis seu ex parte nostra requisite essent de oportunis evectionibus et expensis congruis in eundo morando redeundo provideri super quibus nobis et nostrum cuilibet fidem mandaverint plenariam adhiberi lata per ipsos dominos nostros excommunicationis sententia in rebelles prout hec omnia in litteris ipsorum dominorum cardinalium et domini Summi Pontificis plenius intuentur et nos existentes apud Trenorchium de curia Romana pro predictis negotiis redeuntes quoddam privilegium super gratia facta abbatibus et conventui Cluniacensis monasterii per sanctissimum patrem dominum Bonifacium divina providencia summum pontificem ipsis concessum quod pro exhoneratione dictorum abbatum et indigentie ipsius conventus relevatione de Leuno in Sanguine Terso Ambianensis de Nongento Rotrodi et de Gacicuria Carnotensis de Gaya Trecensis de Vergeyo Eduensis de Vendopera de Mostreto et de Marmissa Lingonensis de Turribus super Maternam Remensis de Carennaco Caturcensis de Moyraco Agenensis de Rocennaco Petragoricensis et de Sancto Cosma Constanciensis diocesum quondam prioratus nunc autem decanatus eidem monasterio Cluniacensi subjecti cum omnibus prioratibus domibus grangiis membris grangiis bonis juribus et pertinenciis eorumdem in quibuscumque diocesibus constitutis sub certa forma mense abbatis et conventus Cluniacensis predictorum ob causas predictas per eumdem Summum Pontificem aplicati ratione fructuum proventuum et reddituum eorumdem ab omni decime ac cujuslibet procurationis impositionis et subventionis prestacione sint exempti perpetuo et penitus habeantur inmunes salvis duntaxat censibus et aliis juribus dicto Cluniacensi monasterio debitis et quod ut hujus gratia et disposicio seu ordinacio inviolabiliter futuris temporibus servaretur auctoritate apostolica sub pena excommunicationis quam in eos qui scienter contra ipsam venire aut eam quomodo libet perturbare presumpserint cujuscumque dignitatis condicionis aut status existant idem dominus Papa protul[er]it et districtius inhibuerit ne quid adversus illam quovis quesito colore occasione vel causa quomodo libet attemptetur quibuslibet non obstantibus viderimus et diligenter inspexerimus viro religioso decano de Paredo procuratore dicti monasterii nobis dictum privilegium exhibente volumus et inhibemus quod si nos ut premittitur de curia Romana redeuntes per aliquem ipsorum locorum facere transitum contigerit aut morari nulla imposicio vel exactio pro nobis ratione expensarum nobis faciendarum aut evectionum nobis providendarum fiat aut etiam requiratur In quorum rei testimonium sigilla nostra presentibus litteris duximus apponenda Datum anno Domini MCC nonagesimo sexto secunda die mensis junii