Charter Document - 02195443

Bonifacius Episcopus servus servorum Dei dilecto filio Abbati Monasterii sancti Benigni Divionensi Lingonensis Diocesis salutem et Apostolicam benedictionem Sua nobis dilecti filii Abbas et conventus Monasterii Balmensis Ordinis S Benedicti Bisontinensis Diocesis petitione monstrarunt quod olim felicis Recordationis Nicolao Pape quarto Predecessori nostro exposito quod Monasterium Cluniacense ad Romanam Ecclesiam nullo medio pertinens adeo debitorum onere et aliis diversis incommodis gravabatur quod nisi de alicujus subventionis remedio per eumdem predecessorem subveniretur eidem in bonis suis irreparabile incurrere poterat detrimentum idem Predecessor filio dilecto Abbati ejusdem Monasterii Cluniacensis pro exoneratione hujusmodi debitorum vicesimam partem omnium proventuum et reddituum Monasteriorum et Prioratuum que sunt immediate et mediate dicto Monasterio Cluniacensi subjecta et aliarum etiam Ecclesiarum tam secularium quam Regularium ad collationem seu presentationem ipsius Abbatis Clun et aliorum Abbatum Ordinis memorati spectanctium per certum temporis spatium per suas litteras sub certa forma concessit dilectis filiis de Marciniaco de sancta Margareta in Elincuria ac sancti Theobaldi de Vitriaco Castro Prioribus Cluniacensis Ordinis Eduensis Bellovacensis et Catalaunensis Diecesum dicto Abbati Cluniacensi super hoc per alias litteras ejusdem predecessoris Certi tenoris executoribus deputatis Et licet dicti Abbas et conventus prefati Monasterii Balmensis qui Ordinis sancti Benedicti tantum existunt et Cluniacensis Ordinis nullatenus nominantur a tempore cujus memoria non exstat et subjecti non fuerunt predicto Cluniacensi Monasterio in aliquo nec existunt nec dictus Abbas Cluniacensis in eodem Monasterio Balmensi Patronatus seu jus aliud obtineret propter quod ad solutionem dicte vicesime minime tenebantur tamen dictus Prior de Marciniaco qui solus in negotio hujusmodi prout ex forma litterarum ipsarum se posse dicebat procedebat prefatos Abbatem et conventum dicti Monasterii Balmensis moneri fecit ut vicesimam partem omnium redituum et Proventuum dicti Monasterii Balmensis infra certum temporis spatium Abbati Cluniacensi persolverent supradicto prefati vero Abbas et conventus dicti Monasterii Balmensis cum memorati Prioris de Marciniano copiam habere non possent pro eo quod interim ad partes transtulit se remotas protestatione coram probis viris facta et causa appellationis expressa videlicet quod iidem Abbas et conventus dicti Monasterii Balmensis Ordinis sancti Benedicti tantum existunt et Cluniacensis Ordinis nullatenus nominantur a tempore cujus memoria non extat et subjecti non fuerunt predicto Cluniacensi Monasterio in aliquo nec existant nec dictus Abbas Cluniacensis in eodem Monasterio Balmensi patronatus seu jus aliquod aliud noscitur obtinere propter quod ad solutionem dicte vicesime minime tenebantur ut superius est expressum a monitione hujusmodi prefati Prioris de Marciniaco et ne ipse Prior hujusmodi occasione procederet contra eos ad Sedem Apostolicam appellarunt Quocirca discretioni tue de utriusque partis Procuratorum assensu per Apostolica scripta mandamus quatenus apud Divionen Civitatem Lingonensis Diocesis vocatis qui fuerint evocandi et auditis hinc inde propositis quod justum fuerit appellatione remota decernas faciens quod decreveris per censuram Ecclesiasticam firmiter observari Testes autem qui fuerint nominati si se gratia odio vel timore subtraxerint censura simili appellatione cessante compellas veritati Testimonium perhibere Datum Laterani quinto Idus Februarii Pontificatus nostri anno primo