Charter Document - 02195436

Bonifacius Episcopus servus servorum Dei dilectis filiis Priori Claustrali et conventui Monasterii Cluniac ad Romanam Ecclesiam nullo medio pertinentis Matisconensis Diocesis salutem et Apostolicam benedictionem Illa quotidiana instantia sollicitudo videlicet Ecclesiarum omnium que Ministerium angit Apostolice servitutis potissimum Nos inducit ut ad illarum consolationem intendamus sollicite ac benigne celeri effectu ipsarum desideria prosequendo que Pastorum sunt solatio destitute ne pro Pastoris Carentia in spititualibus et temporalibus sustineant detrimentum Sed licet ad singulas orbis Ecclesias Pium habeamus affectum ad Monasterium tamen vestrum Cluniacense Caput videlicet Clun Ordinis eo efficacius eoque benignius intuitum nostre considerationis extendimus ejusque desideramus augmentum quo magis ordinem ipsum conspicimus in conspectu Dei et hominum veluti luminare prefulgidum perlucere Ipse quidem Ordo sanctificatus a Domino Sidereo nitore Coruscans viros sancte vite producere consuevit Catholice fidei et Regularis Observantie cultores industrios argumentose probitatis gratia preditos ac caritatis et concordie providos servatores Inter cetera namque opera sanctitatis que per inspirationem divinam in fratribus dicti Ordinis apud idem Monasterium viguisse noscuntur operatus est semper miraculose Dominus in eisdem in Abbatum Electionibus que ibidem pro tempore imminuerunt ut fratres ipsi sic invenirentur in qualibet electione unitati conformes quod uniformitates in exterioribus actibus observata interiorem ipsorum representaret dulciter unitatem Quoniam vix scriptura testatur vel memoria recolit alicujus quod in eodem Monasterio aliqua fuerit Abbatis electio celebrata quam plene ac celeris beatitudo concordie non foveret Sane dudum predicto Monasterio Cluniac per obitum bone memorie fratris Guillelmi olim Abbatis Cluniacensis solatio destitutio Pastoris vos pro futuri substitutione Abbatis presentibus omnibus qui voluerunt potuerunt et debuerunt secundum antiquam ipsius Monasterii consuetudinem commode interesse convenientes in unum quibusdam ex vobis juxta morem ad hoc inibi observatum eligendi personam idoneam in Abbatem et de illa vice omnium vestrum ipsi Monasterio providendi tradidistis plenariam potestatem qui diligenti consideratione prehabita et spiritus sancti gratia invocata in dilectum filium Bertrandum tunc Priorem Prioratus de Charitate supra Ligerim Cluniac Ordinis Antissiodorens Diocesis absentem virum utique providum et honestum ac in spiritibus et temporalibus circumspectum direxerunt unanimiter vota sua ipsumque in ejusdem Monasterii Clun Abbatem Canonice et concorditer elegerunt quam Electionem unus ex eis tam vice sua quam vice ac Mandato Reliquorum Coelectorum suorum mox in Capitulo publicavit dictusque Bertrandus demum consensit Electioni sibi hujusmodi presentate Quare nobis humiliter supplicastis ut cum hujusmodi Electio sit a vobis unanimiter approbata prefatusque Bertrandus propter infirmitatem et debilitatem proprii Corporis quibus ipsum admodum gravati proponitis ad presens ac ob malitiam temporis et viarum discrimina necnon propter gravia et urgentissima debitorum onera dissensiones Regum et turbationes Regnorum et oppressiones multiplices quibus vos ac prefatum Monasterium premi asseritis in instanti commode quin imo absque periculo nequeat Apostolicam Sedem adire pro Confirmationis et benedictionis munere obtinendo providere super hoc de benignitate Apostolica curaremus Nos autem qui ad personam ipsius Bertrandi et ad Monasterium ac Ordinem supradictum singularis animum affectionis habemus ac sibi et eis colletamur in prosperis et compatimur in adversis inherentes hujusmodi electioni sic concorditer de ipso facte quam utique gratam gerimus approbamus et commendationis titulo reputamus et apud Deum et homines fore dignam maxime ob sua laudabilia merita que penes Sedem Apostolicam fide cognovimus oculata et alias relatu didicimus fide digno hujusmodi quoque sue infirmitatis ac debilitatis obstaculum et prelati Monasterii tam onera debitorum quam oppressiones et difficultates alias benigna consideratione pensantes sperantes insuper quod prefatum Monasterium et Cluniacensis Ordo per dicti Bertrandi circumspectionis industriam laudabilia suscipere poterunt in spiritualibus et temporalibus dante Domino incrementa super hoc cum fratribus nostris deliberatione prehabita diligenti ad viam compendii quam utilitati dicti Monasterii sicut predicatur aggravati ne longe vacationis ex alicujus contrarietatis eventu posset incurrere detrimenta et ut suis ac ipsius Monasterii parceremus laboribus et expensis expedire vidimus nostra duximus studia convertenda Quibusdam itaque tam moris quam juris que consueverunt et debent apud Sedem Apostolicam in talibus observari solemnitatibus pretermissis quamvis id deduci nolimus ulterius aliquibus in exemplum dictum Bertrandum sic concorditer electum ipsi Monasterio Cluniac de predictorum fratrum consilio et Apostolice plenitudine potestatis de speciali gratia in Abbatem prefecimus et Pastorem debitam curam administrationem et Regimen ipsius ac membrorum Prioratuum Prepositurarum Ecclesiarum et Vassallorum ejus necnon totius Cluniacensis Ordinis sibi tanquam eorum capiti tam in spiritualibus quam in temporalibus committentes Quocirca universitatem vestram monemus rogamus et hortamur attente per Apostolica vobis scripta mandantes quatenus eumdem Abbatem benigne recipientes et honeste tractantes exhibeatis ei obedientiam et reverentiam debitam et devotam ejus salubria monita et mandata suscipiendo devote ac efficaciter complendo ita quod mutuo inter vos et ipsum spirituale possit abundare gaudium et prosperitatis optate consurgere incrementium Alioquin sententiam quam ipse propter hoc rite tulerit in Rebelles ratam habebimus et faciemus auctore Domino usque ad satisfactionem condignam inviolabiliter observari Datum Rome apud sanctum Petrum quarto Idus Ianuarii Pontificatus nostri anno primo