Charter Document - 02195425

Bonifacius Episcopus servus servorum Dei dilecto filio Guillelmo Abbati Monasterii Cluniacensis ad Rom Ecclesiam nullo medio pertinentis salutem et Apostolicam benedictionem In nostra proposuisti presentia constitutus quod felicis recordationis Nicolaus Papa IV predecessor noster circa tuum et Abbatum ac Priorum Cluniacensi Monasterio subjectorum statum intendens salubriter providere inter cetera statuit et etiam ordinavit ut in destitutione Abbatum et Priorum conventualium scilicet octo Monachorum et supra Cluniacensis Ordinis talis modus et forma servetur videlicet quod si Visitatores Abbatem vel Priorem criminosum invenerint patri Abbati referre procurent qui de consilio sex Abbatum vel Priorum propinquorum ejusdem Ordinis talem amoveat vel suspendat ipseque sic amotus vel suspensus inclinet humiliter nec appellet Adjecit etiam dictus predecessor ordinationi hujusmodi ut nullus qui Ordinis Cluniacensis non fuerit professus habeat ipsius Ordinis Prioratus nec aliquis Prioratus vel Decanatus ejusdem Ordinis cui annexa est animarum cura vacet ultra sex menses Sed infra hujus temporis spatium Abbas Cluniacensis ceterique Abbates et Priores qui Prioratus obtinent et Decanatus hujusmodi subjectos eis debeant providere alioqui provisio Prioratuum et Decanatuum eorumdem Abbati Cluniacensi nullo medio subjectorum intelligatur ad Sedem Apostolicam devoluta Preterea dictus predecessor circa ordinationem bonorum Prioratuum vacantium precepit ut in Prioratibus ejusdem Ordinis per mortem aut amotionem Priorum vacantibus Abbas Cluniacensis Palafredum cappam et Breviarium Prioris premortui secundum antiquam consuetudinem habeat et deductis debitis si qua sint ante omnia et solutis etiam Monachis ibidem commorantibus et Priori futuro ac familie domus pro se suisque necessitatibus usque ad fructus novos prius congrua sustentatione dimissa relictis etiam ad excolendum possessiones necessariis et ad Refectionem domorum si necesse fuerit de residuis mobilibus possit recipere quartam partem Unde cum ex premissis non solum tuus sed etiam Abbatum et Priorum predictorum status sit prout asseris lesus enormiter et concussus Nobis humiliter supplicasti ut providere super iis de benignitate Sedis Apostolice dignaremur Nos itaque tuis supplicationibus inclinati et intendentes tam tibi quam etiam Abbatibus et Prioribus supradictis salubris in hac parte provisionis Remedium impartiri te ac etiam Abbates et Priores eosdem ad statum pristinum in quo tu et ipsi eratis ante Ordinationem et statuta hujusmodi per eumdem Nicolaum predecessorem sicut premittitur facta quoad omnia et singula presentium auctoritate reducimus ordinatione ac statuto nequaquam obstantibus supradictis Nulli ergo [] Datum Anagnie III Idus Julii Pontificatus nostri anno primo