Charter Document - 02195417

Bonifacius Episcopus servus servorum Dei dilectis filiis de Rivis Claromonten et sancte Margarete in Helincuria Belvacen ac de Cariloco Matisconen Diecesum Prioratuum Prioribus salutem et Apostolicam benedictionem Exposuit nobis dilectus filius Abbas Monasterii Clun ad Romanam Ecclesiam nullo medio pertinentis quod felicis Recordationis Nicolaus Papa IV predecessor noster intellecto quod Monasterium Clun tanto debitorum onere et aliis diversis erat incommodis pregravatum quod nisi de celeri remedio succurreretur eidem verendum erat ne per usurarum voraginem et alias etiam multipliciter Monasterium ipsum in bonis suis incurreret irreparabile damnum Eidem Abbati vicesimam partem omnium proventuum et reddituum Monasteriorum Prioratuum et Domorum que sunt immediate et mediate dicto Monasterio Clun subjecta et aliarum etiam Ecclesiarum tam secularium quam regularium ad collationem seu presentationem ejusdem Abbatis et aliorum Abbatum Priorum et Conventuum Ordinis Cluniacensis spectantium in solutionem dictorum debitorum totaliter convertendam usque ad sex annorum spatium per litteras suas concessit de gratia speciali non obstantibus quibuslibet indulgentiis Apostolicis impetratis vel impetrandis per quas concessioni hujusmodi posset quomodo libet obstaculum interponi seu quibuslibet contrariis consuetudinibus vel statutis juramento confirmatione Sedis Apostolice seu quacumque alia firmitate vallatis Per hujusmodi autem gratiam dicto Abbati factam noluit idem predecessor Prelatis illis ad quos eisdem Ecclesiis in quibus dictus Abbas et ceteri Abbates ac Priores predicti presentationem habent institutio spectare dignoscitur aliquod circa institutionem ipsam prejudicium generari Verum quia sicut asseritur hujusmodi vicesima sic prefato Abbati a memorato predecessore concessa ad satisfactionem predictorum non sufficit debitorum et de predicto tempore sex annorum modicum noscitur superesse dictusque Abbas alia debita de novo contraxerit pro suis et ejusdem Monasterii Cluniacensis negotiis procurandis nos volentes in hac parte eidem Abbati gratiam facere ampliorem per quam facilius debeat dictum Monasterium Cluniacense a debitorum ipsorum onere liberari vicesimam partem omnium reddituum et proventuum predictorum pro exoneratione debitorum predictorum secundum formam et modum in prefatis litteris ejusdem predecessoris nostri contentos memorato Abbati per alias litteras nostras concessimus per quinquennium a tempore quo predictorum sex annorum spatium finitum fuerit computandum ita quod vicesima ipsa per de Celsiniis de Crespeio et de Marciniaco Prioratuum Priores Cluniacensis Ordinis ac Camerarium sancti Martini de Campis Parisien ejusdem Ordinis colligatur per eos aut duos eorum in solutionem dictorum debitorum integre convertenda idemque Abbas de prefata vicesima ab eo jam percepta teneatur coram eis ac ipsi de hujusmodi vicesima recipienda per eos coram ipso Abbate ac majore vel claustrali Prioribus dicti Monasterii Clun et sociis in Ordine annis singulis teneantur reddere rationem nonobstantibus omnibus supradictis Unde nos vobis per alias nostras damus litteras in mandatis ut vos vel duo aut unus vestrum per vos vel per alium seu alios hujusmodi vicesimam tam per dictum predecessorem quam per nos sic concessam juxta hujusmodi ejusdem predecessoris ac nostre concessionum tenores colligi et de ipsa rationem reddi et de illa que soluta pro preterito tempore non existit plenariam satisfactionem impendi ab illis qui tenentur ad exhibitionem ejusdem vicesime faciatis contradictores per censuram Ecclesiasticam appellatione postposita compescendo Volentes itaque animarum saluti prout ad nostrum spectat officium providere ac gerentes de vestre discretionis industria fiduciam in Domino specialem vobis et vestrum cuilibet absolvendi eos qui excommunicationum sententias pro dicta vicesima hactenus non soluta necnon et illos qui pro defectu solutionis ipsius vicesime concesse per nos imposterum faciende sententias ipsas incurrent ab hujusmodi sententiis juxta formam Ecclesie vice nostra et dispensandi cum eis super irregularitate quam predictis ligati sententiis divina officia celebrando seque ipsis immiscendo aut suscipiendo Ordines contraxerint vel contrahent in futurum injuncta eis propter hoc penitentia salutari vobis concedimus tenore presentium facultatem Datum Anagnie V Idus Julii Pontificatus nostri anno primo