Charter Document - 02195402
| Charter Number: | 02195402 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1294 |
| Date type: | Internal, A.D., Feast |
| Resource Link(s): |
CCE: cartae cluniacenses electronicae |
Charter:
Philippus Dei gratia Francorum rex Universis presentes litteras inspecturis salutem Noverit universitas vestra quod cum religiosi viri abbas Clugniacensis ceterique abbates et priores Clugniacensis ordinis dilecti nostri nuper Senonas propter hoc specialiter evocati decimam omnem ecclesiasticorum proventuum suorum nobis in subsidium pro defensione et felici statu regni nostri et pro reprimendis emulorum et inimicorum ejusdem regni nostram et ipsius transquillitatem et pacem turbare satagentium hostilibus impugnationibus nobis ad byennium integrum sub certis modis et conditionibus concesserint graciose prout in patentibus ipsius abbatis litteris inde confectis plenius continetur hoc expresse adjecto in condicionibus antedictis quod nos aut duces comites barones castellani et alii domini nostro subjecti dominio quicumque sint et cujuscumque condicionis existant a dictis abbatibus prioribus personis familia et hominibus ac hospitibus dicti ordinis occasione impugnationum et defensionis hujusmodi pro quibus religiosi prefati subventionem hujusmodi nobis prestant nullam aliam subvencionem per viam doni seu mutui aut alicujus cujuslibet extraordinarie exactionis valeamus aut levare salvis tamen antiquis juribus vel deveriis et serviciis ordinariis nostris et dominorum ipsorum in casibus consuetis in personis aut rebus propter hoc molestari offendi gravari vel alias opprimi nequeant nosque hujusmodi gravamina si eis occasione hujusmodi inferrentur submovere curabimus et ipsos ab hujusmodi gravaminibus defendere et tueri Nos hujusmodi decimam ab ipsis oblatam nobis taliter et concessam sub modis et condicionibus antedictis tenore presencium acceptamus modos et condiciones eosdem volentes laudantes et approbantes expresse Nolentes nec intendentes hoc ad consequenciam trahi vel abbatibus prioribus et ordini supradictis aliquam per hoc novitatem induci vel prejudicium generari In cujus rei testimonium presentibus litteris nostrum fecimus apponi sigillum Actum Parisius die lune in festo beati Luce evangeliste anno Domini MCC nonagesimo quarto