Charter Document - 02195400

Celestinus episcopus servus servorum Dei dilectis filiis preposito de Susseio in ecclesia Eduensi et cantori ecclesie Cabilonensis salutem et apostolicam benedictionem Sua nobis venerabilis frater noster Nicolaus Matisconensis episcopus gravi conquestione monstravit quod Guichardus prior Guillelmus decanus Gerardus Raynerii Rolandus Symelli Petrus de Duno Alexander monachi monasterii Cariloci ac Ugo et Petrus Lathomi conversi Cluniacenses Guichardus et Bernardus laici familiares predicti prioris Cariloci Matisconensis diocesis eundem episcopum tam in persona quam in bonis Matisconensis ecclesie offendere ac injuriari episcopali reverentie multipliciter satagentes prefatus Guichardus prior in eundem episcopum indutum insula hora misse post evangelium in ecclesia Bellijoci eidem episcopo jure diocesano subjecta Dei timore ac pontificali honore postpositis temere manus violentas iniciens ipsum episcopum per indumenta cepit et tamdiu eundem episcopum violenter tenuit quamdiu quamdam scripturam longam in presentia ipsius episcopi legi fecit Guillelmus vero decanus Gerardus Raynerii et Rolandus Symelli supradicti altare quoddam constitutum in parrochia ecclesie Cariloci ac magnum lapidem ipsius altaris frustatim ausu sacrilego fregerunt Deinde dicti decanus et Gerardus Raynerii Petrus de Duno et Alexander monachi Guichardus et Bernardus laici ejusdem prioris Cariloci familiares hostium cancelli ejusdem ecclesie Cariloci armariola et archas ubi calices et ornamenta ipsius ecclesie reponebantur injuriose frangentes in ipsa ecclesia per dictum episcopum [monastico] supposita interdicto in contemptum clavium divina officia campanis pulsatis et januis apertis solemniter celebrarunt immo potius prophanarunt et adhuc celebrant sepeliendo inibi corpora defunctorum Nec minus etiam Johannes dictus Braindic Bartholomeus de Sancto Marcello Hugo et Petrus Lathomus conversi Cluniacenses et Johannes de Sancto Raveniano laicus prenominati quandam capellam sitam infra fines parrochialis ecclesie de Cortambert ejusdem diocesis episcopo prefato subjectam et altare ipsius capelle funditus destruxerunt Tandem Philippus de Savigniaco et frater Hugo de Bruheriis tunc decanus de Lorduno monachi Cluniacenses prefati interdictum per officialem ipsius episcopi in parrochiali ecclesia de Taysiaco modo simili temere violarunt clericos seculares ipsius episcopi absque causa capiendo et mancipando carceribus ac detinendo licet in eos jurisdictionem nullam habeant ordinariam sive etiam delegatam Demum ut injurias sepe dictus Guichardus prior cum complicibus suis contra prefatum episcopum injuriis cumularet per fratrem Bernardum priorem Sancti Albini de Lugduno ordinis Sancti Augustini gerentem se pro subdelegato dilecti filii abbatis Crudatensis Vivariensis diocesis conservatoris ut dicitur privilegiorum Cluniacensis ordini[s] a Sede apostolica indultorum fecit sepedictum episcopum honore et dignitate pontificali de facto privari mandans dictus Bernardus decano archidiacono et canonicis Matisconensibus ut dictum episcopum dignitate et honore predictis privatum fore publice nuntiarent ac postmodum prefato episcopo super premissis injuriis et aliis prosequendis in Romana curia constituto [] abbas de Benedictione Dei Cisterciensis ordinis Lugdunensis diocesis ad instantiam fratris Guillelmi archidiaconi Cluniacensis asserens se executorem seu subdelegatum datum ab abbate Sancti Illidii Claromontensis conservatore ut dicitur privilegiorum Cluniacensi ordini concessorum eundem episcopum privatum fore omni honore pontificali publice nichilominus nuntiavit Verum cum talia si vera sint non possimus sub dissimulatione transire discretioni vestre per apostolica scripta mandamus quatinus vos vel alter vestrum de premissis et aliis articulis quos inclusos sigillo venerabilis fratris nostri J[oannis] Beneventanensis archiepiscopi apostolice Sedis vice cancellarii una cum presentibus vobis transmittimus summaria indagine sine strepitu et figura judicii solerter inquirentes si eos inveneritis ut premittitur deliquisse contra episcopalem reverentiam tam prefatos priorem subdelegatos et abbatem denuntiatores quam alios supradictos ex parte nostra peremptorie citare curetis ut infra competentem terminum per vos prefigendum eisdem personaliter se conspectui apostolico representent facturi et recepturi super premissis quod dictaverit ordo juris Diem vero citationis et formam nomina citatorum coram quibus et quid inde feceritis remissis presentibus nobis sub vestris sigillis fideliter intimare curetis Datum Aquile III kalendas octobris pontificatus nostri anno primo