Charter Document - 02195386

Nicolaus Episcopus servus servorum Dei dilectis filiis de Marciniaco de sancta Margareta de Caroloco Prioratuum Prioribus Cluniacensis Ordinis Eduensis Belvacensis et Matisconensis Diecesum salutem et Apostolicam benedictionem Dudum ad nostram perlatum est notitiam quod licet nonnulli Prioratus Monasterio Cluniac mediate ac immediate subjecti tanto tempore vacavissent quod ad Sedem Apostolicam erat ipsorum collatio secundum statuta Lateranensis Concilii legitime devoluta et felicis Recordationis Gregorius Papa IX predecessor noster dum viveret statuisset expressius inhibendo ne aliquis Cluniacensis Ordinis non existens haberet ipsius Ordinis Prioratum et Prioratus predicti personis secularibus nullatenus conferrentur Quidam tamen Prelati Monachi et alii Religiosi clerici seculares et Laici Prioratus eosdem contra inhibitionem et statute predicte in animarum suarum periculum et plurimorum scandalum detinebant Nos auctoritate Apostolica nihilominus duximus statuendum ut nullus ejusdem Ordinis Prioratus ultra sex menses vacaret quodque aliquis qui ejusdem non existeret Ordinis non haberet ipsius Prioratum nec Prioratus predicti personis secularibus clericis vel Monachis alterius Ordinis conferrentur et quod ubi contrarium attentatum existeret Diffinitorum revocaretur arbitrio Cluniacensis Capituli Generalis vobis per litteras nostras injuncto ut vocatis qui existerent evocandi vos vel duo aut unus vestrum per vos vel per alium seu alios sine strepitu et figura judicii detentores predictorum Prioratuum quorum collatio propter tantam vacationem secundum statuta Lateranensis Concilii supradicti ad Sedem predictam fuerat collatio devoluta ab eis auctoritate nostra curaretis penitus amovere ac dilecto filio Guillelmo Abbati Monasterii Cluniacensis ex parte nostra districte injungeretis ut illos qui ex Prioratibus supradictis ad ipsius collationem spectarent ejusdem Ordinis Monachis conferre curaret faciendo reliquos ex Prioratibus ipsis per Abbates et Priores ad quos eorum collatio noscitur pertinere conferri et quod Monachos illos quibus iidem Abbates et Priores Prioratus ipsos ducerent conferendos in corporalem possessionem eorum et jurium et pertinentium suorum auctoritate nostra induceretis et defenderetis inductos contradictores per censuram Ecclesiasticam appellatione postposita compescendo nonobstantibus si aliquibus cujuscumque dignitatis ordinis conditionis aut status a Sede Apostolica esset indultum quod interdici suspendi vel excommunicari non possent per litteras dicte Sedis non facientes plenam et expressam de indulto hujusmodi mentionem et qualibet alia prefate Sedis indulgentia generali vel speciali cujuscumque tenoris existeret per quam effectus dictarum litterarum impediri vel differri valeret et de qua in ipsis litteris habenda esset mentio specialis seu potestate concessa super hoc ab eadem Sede Diffinitoribus supradictis Cum autem Diffinitores predicti ad exequenda predicta de facili nequeant sicut idem Abbas asserit convenire Cum sint numero quindecim et anno quolibet mutari debeant ac in diversis Regionibus commorentur nec etiam vos propter subterfugia malitias seu Rebelliones et potentiam aliquorum qui nonnullos ex Prioratibus detinent supradictis mandata hujusmodi vobis facta usquequaque potueritis adimplere licet qualiter in vobis extitit ad hoc operam dederitis efficacem idem Abbas nobis humiliter supplicavit ut eidem Monasterio Cluniacensi non levi debitorum onere pregravato paterno compatientes affectu providere illi super iis de benignitate Sedis Apostolice curaremus Unde nos ad ipsius Monasterii statum tranquillum et prosperum intendentes et volentes proptere a ipsius Abbatis petitioni benigne annuere in hac parte discretioni vestre per Apostolica scripta mandamus quatinus vocatis qui fuerint evocandi vos vel duo vel unus vestrum per vos vel per alium seu alios sine strupitu et figura judicii competenti monitione premissa detentores predictorum Prioratuum auctoritate Apostolica minime collatorum ab eis auctoritate nostra curetis penitus amovere ac dilecto filio Guillelmo Abbati Monasterii Cluniacensis predicto ex parte nostra injungere ut illos qui ex Prioratibus supradictis ad ipsius collationem spectare noscuntur ejusdem ordinis Monachis conferat faciendo reliquos ex Prioratibus ipsis per Abbates et Priores ad quos eorum collatio noscitur pertinere conferri illos autem Monachos quibus iidem Abbates et Prioratus ipsos duxerint conferendos in corporalem possessionem eorum et jurium et pertinentiarum suorum auctoritate nostra inducere ac inductos defendere studeatis invocato ad hoc si opus fuerit auxilio Brachii secularis Nonobstantibus supradictis aut appellationibus super premissis ab aliquibus ad Sedem Apostolicam interjectis aut quibuscumque processibus vel aliis de quibus esset in presentibus litteris qualiscumque mentio facienda contradictores per censuram Ecclesiasticam appellatione postposita compescendo Datum apud Vrbemveterem X Kal Augusti Pontificatus nostri anno IV