Charter Document - 02195370

Nicolaus Episcopus servus servorum Dei dilectis filiis Priori et conventui Monasterii Cluniacensis ad Romanam Ecclesiam nullo medio pertinentis salutem et Apostolicam benedictionem Onerosa pastoralis officii summi dispositione Pastoris qui pro suis ovibus animam posuit nobis licet immeritis cura commissa sollicita nos pulsat instantia ut inter cetera que quasi torrens undique consistunt quibusve noster animus redditur multiplici varietate distractus ad provisionem Ecclesiarum et Monasteriorum vacantium sollicitius intendamus ne ipsis pastoris presidio destitutis ambulantis in circuitu lupi astutia eorum oves rapiat et dispergat ne manus avida illorum bona diripiat ne jura presumptuosus insuper Ideoque solliciti reddimur ut illa Pastoribus dirigantur idoneis et Rectoribus providis gubernentur Tunc enim puppis salubri processu dirigitur cum Rectoris industrii gubernatione non caret Tunc etiam fructibus ager exuberat cum sibi cultoris non deest presentia diligentis Sane Monasterio Cluniacensi ad Romanam Ecclesiam nullo medio pertinente per mortem quondam Yvonis ipsius Monasterii Abbatis solatio destituto pastoris et ejus corpore Ecclesiastice tradito sepulture vocatis qui vocandi fuerunt vos pulsato prout moris existit in simul in capitulo convenistis et presentibus omnibus qui debuerunt voluerunt et potuerunt commode interesse invocata spiritus sancti Gratia tu Prior secundum antiquam ipsius Monasterii quam vos asseritis consuetudinem de voluntate et assensu tui conventus tres ipsius Monasterii Monachos videlicet Ioannem Priorem claustralem et duos alios nominasti qui decem de ipsius Monasterii gremio Monachos fide dignos et providos prout ex concessa sibi a vobis potestate potuerunt secum ad eligendum Abbatem in eodem Monasterio assumpserunt Prefati vero Prior Claustralis et Monachi facultate sibi a vobis providendi dicto Monasterio de Abbate tradita et a vobis recepta prestito juramento quod de persona idonea per Electionem Canonicam eidem Monasterio providerent secedentes in partem tractatu super hoc habito diligenti Deum habentes pre oculis in dilectum filium Guillelmum Abbatem Monasterii Cluniacensis tunc Priorem Prioratus de Condemina Gebennensis Diocesis vota sua unanimiter et concorditer direxerunt Ipsis autem ad Capitulum redeuntibus supradictum nominatus Prior Claustralis vice sua et hujusmodi collegarum seu Consociorum suorum ac etiam de mandato vestro tui Prioris et singulorum de vobis eumdem Guillelmum in vestrum et ipsius Monasterii Abbatem elegit Nos igitur attendentes tantam eligentium concordiam et laudabile testimonium fame ipsius claraque sue probate conversationis et vite merita quibus redditur insignitus ac supplentes omnem defectum in predictis et etiam si quis in dicte electionis sue processu extitit Electionem ipsam de fratrum nostrorum Concilio duximus confirmandam ipsumque prefecimus ipsi Monasterio in Abbatem Benedictionis munus postmodum sibi nostris manibus impendentes firma concepta fiducia quod dirigenre Domino actus suos prefatum Monasterium per sue circumspectionis industriam in spiritualibus et temporalibus prospere dirigetur et salubria dante Domino suscipiet incrementa Quocirca universitati vestre per Apostolica scripta mandamus quatenus eidem Abbati tanquam Patri et Pastori animarum vestrarum humiliter intendentes exhibeatis ei obedientiam et Reverentiam debitam et devotam ejusque salubria monita et mandata suscipiatis devote ac efficaciter adimplere curetis Alioquin sententiam quam idem propter hoc rite tulerit in Rebelles ratam habebimus et faciemus auctore Domino usque ad satisfactionem condignam inviolabiliter observari Datum Rome apud sanctam Mariam Majorem V Kalendas Februarii Pontificatus nostri anno II