Charter Document - 02195368
| Charter Number: | 02195368 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1290 |
| Date type: | Internal, Papal |
| Resource Link(s): |
CCE: cartae cluniacenses electronicae |
Charter:
Dilectis filiis [] majori et [] claustrali monasterii Cluniacensis prioribus Sperantes firmiter quod vos mentis oculis erectis ad Dominum et ad ejus obsequia studiis exercenda sollicitis directo proposito ad prosperum et quietum ordinis vestri statum intendatis attentius et ad id opum libenter et operam impendatis ea vobis fidutia secura committimus que statum ipsum contingere dinoscuntur Dudum siquidem dilecti filii fratres Stephanus Petrus de Lenthona Guido de Sancto Gelasio Guillelmus de Sancto Theobaldo et Guichardus de Flabeyo prioratuum priores Jocerandus du Says hostellarius et ebdomadarius majoris misse ac Stephanus de Brueria Cluniacensis monasterii monachus diligentius attendentes quod nonnulla statuta que felicis recordationis Gregorius papa VIIII predecessor noster super reformatione Cluniacensis ordinis edidit et que in virtute obedientie observari precepit in ordine ipso minime servabantur tum ex hoc tum etiam ex aliis certis causis ad sedem apostolicam appellarunt Cumque propter hoc priores et monachi supradicti ad eandem sedem personaliter accessissent nos ad reformationem et tranquillitatem monasterii et ordinis eorumdem paterne sollicitudinis studio intendentes hujusmodi negotium dilectis filiis nostris Matheo tituli Sancti Laurentii in Damaso et Hugoni tituli Sancte Sabine presbyteris cardinalibus commisimus audiendum qui juxta nostre commissionis formam in eo sollicite procedentes inter cetera ordinarunt ut prioribus et monachis ipsis pro factas et etiam faciendis ab eis in predicto negotio sumptibus mille et ducente libre turonensium parvorum ab eodem monasterio vel ordine solverentur Nos autem prefatis prioribus et monachis ad prioratus et administrationes eorum exigente justitia restitutis sollicite advertentes quod hujusmodi pecunie quantitas pro eisdem factis et etiam faciendis expensis minus sufficiens existebat pretactis prioribus dictos prioratus pro expensis eisdem usque ad duo milia librarum ejusdem monete libere obligandi predictis mille et ducentis computatis in eis plenam benigne concessimus facultatem Cum autem prelibati priores pro reformatione ordinis antedicti dampna gravia et labores non modicos ac multiplices augustias tolerarent et ideo dignum sit et rationi consonum dinoscatur ut ab hujusmodi gravaminibus per eundem ordinem releventur discretioni vestre per apostolica scripta districte precipiendo mandamus quatenus ad bonum et pacificum statum ordinis et monasterii predictorum prout teneri noscimini sollertius intendentes predicta duo milia librarum turonensium facietis quam cito comode fieri poterit jam dictis prioribus ab ordine memorato persolvi Contradictores [] Non obstante si aliquibus a sede apostolica sit indultum quod interdici [] Volumus tamen quod priores ipsi juxta quantitatem redituum et proventuum prioratuum suorum contribuant in eisdem Sic ergo in hoc diligenter et efficaciter vos habere sicque mandatis nostris obedire curetis ut vos ejusdem ordinis pacem stabilem et quietem diligere per effectum operis ostendatis nosque vestre sollicitudinis studium et devotionis allectum exinde non immerito commendemus Dat Rome apud Sanctam Mariam Majorem v idus januarii anno secundo