Charter Document - 02195343
| Charter Number: | 02195343 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1286 |
| Date type: | Internal, Calendar, Papal |
| Resource Link(s): |
CCE: cartae cluniacenses electronicae |
Charter:
Honorius Episcopus servus servorum Dei dilecto filio Abbati Monasterii Cluniacensis salutem et Apostolicam benedictionem Quanto Ordinem Cluniacensem observantia Regule strictiori vigere conspicimus et florere tanto magis delectamur et cupimus nos ad illa semper promptiores haberi per que personarum ejusdem Ordinis consulatur quieti caveatur dispendiis et gravaminibus occurratur Cum igitur sicut nobis exponere curavisti per Sedis Apostolice providentiam prohibitum fuerit et statutum ne Cluniacensis Ordinis Abbas quisquam vel Prior Prioratuum vel Grangiam pensionem seu Monachalem prebendam persone concedere seculi aut vendere vel alienare quoquomodo aliquam possessionem presumat absque Patris Abbatis vel Prioris et conventus sui Concilio quidam Abbates et Priores Ecclesiarum immediate tuo Monasterio subjectorum absque tuo et predecessorum tuorum et aliquando conventum eorumdem consensu et concilio concedere Prioratus grangias pensiones et prebendas ac possessiones alienare ac vendere presumpserunt contra statuta et inhibitionem sedis Apostolice temere veniendo Quare nobis humiliter supplicasti ut indemnitati Ecclesiarum ipsarum debitorum onere gravatorum providere super iis misericorditer curaremus Nos igitur personam tuam et Ordinem Cluniacensem illa favoris gratia prosequentes quod libenter tuis postulationibus in iis que tibi et Ecclesiis ac personis Monasterio tuo subjectis profutura novimus intendamus tuis precibus inclinati hujusmodi venditiones et alienationes necnon concessiones Prioratuum grangiarum pensionum ac prebendarum ipsarum contra inhibitionem et statuta Sedis Apostolic attentatas nunciantes irritas et inanes quod prefati Abbates et Priores ad solutionem prebendarum et pensionum ipsarum compelli nequeant tibi ad instar felicis recordationis Innocentii Pape IV predecessoris nostri auctoritate presentium indulgemus Nulli ergo [] Datum Rome apud sanctam Sabinam Nonis Maii Pontificatus nostri anno primo