Charter Document - 02195330

Honorius Episcopus servus servorum Dei dilectis filiis Abbati et conventui Monasterii Cluniacensis ad Romanam Ecclesiam nullo medio pertinentis Matisconensis Diocesis salutem et Apostolicam benedictionem Desideriis vestris in iis affectu benevolo libenter annuimus per que materia summota gravaminis personarum et status vestri Ordinis tranquillitas procuretur Sane petitio vestra Nobis exhibita continebat quod licet Abbates Priores et Monachi Cluniacensis Ordinis ab omni jurisdictione Archiepiscoporum Episcoporum et aliorum quorumlibet judicum Ordinariorum per specialia Privilegia Sedis Apostolice sint exempti tamen venerabiles fratres nostri Archiepiscopi et Episcopi ac etiam alii ordinarii Regni Anglie in Priores et Monachos dicti Ordinis in Regno ipso existentes excommunicationis sententias de facto cum de jure non possint temeritate propria promulgare presumunt et si dicti Priores et Monachi per quadraginta dies hujusmodi sententias sustinuerint ipsos pretextu cujusdam consuetudinis que in Regno habetur eodem per Dominos temporales capi faciunt et carcerali custodie mancipari in vestrum et dicti Ordinis prejudicium non modicum et gravamen Quare pro parte vestra fuit nobis humiliter supplicatum ut salubre super hoc remedium apponere de benignitare Sedis Apostolice curaremus Cum igitur id videatur in Apostolice Sedis injuriam redundare nos hoc aliquatenus tolerare nolentes vestris supplicationibus inclinati auctoritate presentium districtius inhibemus ne aliqui Domini vel judices seculares dicti Regni pretextu sententiarum et consuetudinis hujusmodi si sententie predicte in casu a jure non concesso prolate fuerint dictos Priores vel Monachos capere vel incarcerare presumant Nulli ergo [] Datum Rome apud sanctam Sabinam Pontificatus nostri anno primo