Charter Document - 02195302
| Charter Number: | 02195302 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1283 |
| Date type: | Internal, Papal |
| Resource Link(s): |
CCE: cartae cluniacenses electronicae |
Charter:
Martinus Episcopus servus servorum Dei dilectis filiis Abbati et conventui Monasterii Cluniacensis salutem et Apostolicam benedictionem Ex parte vestra fuit nobis humiliter supplicatum ut Ecclesiam sancti Petri de Castanea Viterbiens ejusque Officinas cum horto juxta Ecclesiam ipsam sito in quibus fratres de penitentia Iesu Christi hactenus permanserunt et que ab eisdem fratribus [ut asseritis] derelicte secundum constitutionem in Concilio Lugdunensi super hoc editam in Sedis Apostolice dispositione consistunt vobis locum aliquem in Civitate Viterbiensi non habentibus concedere de benignitate Apostolica dignaremur Nos itaque volentes vobis in hac parte gratiam facere specialem premissis veris existentibus Ecclesiam Officinas ac hortum predictos cum omnibus juribus et pertinentiis suis dummodo jus alicui alii non competat in eisdem Apostolica vobis auctoritate conferimus et de ipsis nihilominus providemus a vobis vestrisque successoribus perpetuo retinendos Ita tamen quod in predicta Ecclesia congrue faciatis per personas idoneas vestri Ordinis deserviri Nulli ergo omnino hominum liceat hanc paginam nostre Collationis et provisionis infringere vel ei ausu temerario contraire Si quis autem hoc attentare presumpserit indignationem Omnipotentis Dei et Beatorum Petri et Pauli Apostolorum ejus se noverit incursurum Datum apud Vrbemveterem V Idus Februarii Pontificatus nostri anno II