Charter Document - 02195285

Universis et singulis presentes litteras inspecturis et audituris nos Hugo de Torceyo miles et Yolanz uxor dicti militis notum facimus quod nos spontanea voluntate et unanimi consensu considerata utilitate nostra evidenti accipimus habemus et tenemus in feudum a religiosis viris Yvone abbate et conventu ejusdem loci nomine ecclesie Cluniacensis domum nostram de Chaseignoles sitam in parrochia de Gevre Cabilonensis dyocesis cum omnibus pertinenciis et appendiciis dicte domus et toto nemore circonsta[n]te brociis terris arabilibus nostris sitis prope dictam domum inter fines parochiatus de Drace et viam qua itur de Cabilone apud Gevre Item capimus in feodum a dictis religiosis unam peciam vinee sitam apud Gevre ante domum es Sarmaissez quam Girardus prepositus de Gevre tenet a nobis in feodum item partem nostram prati quod dicitur pratum de Fontenes necnon quicquid Girardus prepositus de Gevre et dominus Radulphus de Clavoilon miles tene[n]t a nobis in feodum que omnia et singula fuerunt de feodo domini Johannis de Salon militis domini Sancti Romani quod feudum seu jus feudale acquisivimus in proprium allodium a dicto domino de Salon Item capimus in feodum a dictis religiosis quicquid Morellus de Argille domicellus et Guillelmus de Borbaille tenent in dicto loco de Chassenoles quod de feodo Girardi prepositi de Gevre que idem Gerardus tenet a nobis [in] retrofeudum Pro feudo autem predicto fecimus dictis religiosis nomine ecclesie Cluniacensis homagium et fidelitatem promittentes pro nobis et nostris per juramenta nostra propter hoc super sancta Dei euvangelia corporaliter prestita eidem abbati ejusque successoribus abbatibus et conventui et etiam ecclesie Cluniacensi servare et tenere fidelitatem quam vasselli servare domino suo tenentur ac facta et servitia quecunque facere et tenere que secundum usus et consuetudines patrie sunt a vassellis suo domino facienda et pro acceptione feudi supradicti prenominatus abbas dedit nobis ac tradi et deliberari fecit quadraginta libras Turonensium quas habuimus et recepimus in pecunia numerata de quibus nos tenemus integre pro pagatis Promittimus etiam quilibet in solidum pro nobis et nostris sub prestitis juramentis et sub obligatione omnium bonorum nostrorum ubicumque sint et quecumque et per stipulationem sollempnem omnia et singula predicta tenere facere adimplere et inviolabiliter observare et predicta in feodum accepta dictis religiosis fideliter garantire et non venire de cetero contra predicta vel aliqua predictorum per nos vel per alium in toto vel in parte facto seu verbo in juditio vel extra judicium nec consentiemus alicui contravenienti renunciantes in hoc facto pro nobis et nostri[s] sub prestitis juramentis omni actioni et exceptioni doli et in factum deceptionis revocationis non numerate pecunie nec recepte spei future nominationis faciende omnibusque privilegiis graciis indulgentiis et litteris nobilibus mulieribus crucesignatis et crucesignandis indultis et indulgendis sub quacumque forma verborum impetratis et impetrandis omnibus aliis exceptionibus et rationibus juris et facti ad hoc pertinentibus et omni juri canonico et civili seu consuetudinario quod nobis et nostris posset competere vel prodesse ad veniendum contra tenorem presentium litterarum nos et heredes nostros quoad hoc juridictioni curie Cabilonensis supponentes ubicumque fecerimus mansionem sine advocatione alterius curie sive fori In horum memoria sigillum curie Cabilonensis presentibus litteris rogavimus et obtinuimus apponi Nos vero Odo officialis et canonicus Cabilonensis ad requisitionem predictorum domini Hugonis militis et domine Yolant uxoris ejusdem militis sigillum curie Cabilonensis presentibus litteris apponimus in testimonium veritatis Datum anno Domini MCCLXXX primo mense novembris