Charter Document - 02195267

Nous Robers dux de Burgongne faisons savoir à tous cels qui orront et verront ces presentes lectres que cumme messires Pierres de Orgüer chevaliers ait reconeu publicment en jugement par devant nos que il a vendu au prieuré de Blancé la joustise et la seignorie doudit prioré et dou cimetiere de Blansé de ce qui estoit de la garde audit Perron sauve la grant joustise desdis leus que est au seigneur de Chatiau Vilain si cum li dis Pierres aferme par devant nos et ausi con li dis Pierres dit que il est contenu es lectres sellées dou seel audit seigneur de Chastiau Vilain que nos dou cui riere fié lesdites choses vendues sunt ladite vandue de tant come il nos apartient loons et ostroions et l'avons pour ferme et pour estable et promettons que nos ne vandrons pas à l'encontre ne ne consantirons à venir En tesigmoignage de la quel chose nos avons mis nostre seel en ces presentes lectres faites et données en l'an de l'incarnation Nostre Seigneur mil et CCLX et XIX ou mois de novembre