Charter Document - 02195264

Universis presentes litteras inspecturis nos Johannes miles dominus Castri Vilani et Luzeiz notum facimus quod cum dominus Petrus li Orgeuz miles non vi non dolo non metu ad hoc inductus sed spontaneus et providus et pro urgenti necessitate et evidenti utilitate ejus ut dicebat vendidit ac titulo pure et perfecte venditionis tradidit sine retentione et reclamatione aliqua in posterum Hugoni dicto Bressodi clerico administratori prioratus Blancii nomine ipsius prioratus et pro ipso prioratu ementi omnimodam justitiam et blaiariam quam habebat in hominibus de sua garda existentibus inferius nominatis videlicet de Montaulon de Sancto Juliano dou Mespler de Urbileio de Moncello et justiciam quam habebat supra sextam partem dominii Blanzeii ad dictum prioratum pertinentem ut dicebat dictus Petrus ac in cimiterio et generaliter in omnibus locis ipsius prioratus et generaliter quicquid juris habebat in hominibus et mansis inferius nominatis et quicquid juris jurisdictioni[s] et justitie habebat in terris ad dictum prioratum spectantibus Item vendidit dictus Petrus dicto Hugoni nomine quo supra quicquid juris habebat in hominibus infrascriptis quando dividunt focos suos scilicet quod ipse debebat habere ut dicebat II bichetos avene et duas gallinas cum corveiis ad arbitrium sue voluntatis in quolibet foco d[i]viso Vendidit etiam panem et canabum ad opus canum quam in predictis hominibus habebat seu habere poterat et debebat nichil juris juridictionis et justicie in dictis rebus venditis retinendo preterquam duos b[i]chetos avene et tres corveias scilicet duas de bobus et unam de corpore ita quod illam de bobus potest ducere apud Cabilonem vel apud Borbonium vel apud Belnam pro suis rebus prop[r]iis ducendum non alienis ad expensas proprias dicti Petri aliam corveiam de bobus non potest ducere ad longius quin revertatur in sero et primam corveiam debet accipere a festo beate Marie Magdalene usque ad festum Omnium Sanctorum et non ultra Secundam corveiam pro qua debet reverti in sero ad hospicium debet accipere a festo Omnium Sanctorum usque ad carniprivium et non ultra Illam vero de corpore a carniprivio usque ad Pascha Nichil juris jurisdi[c]tionis justicie dominii et actionis in hominibus infra scriptis seu eorum mansis et terris seu locis dicti prioratus quocumque nomine censeantur retinendo preter quam nomine garde in manso Durandi Guieti duos bichetos avene et unam gallinam item in manso Boillodi du Mespler duos bichetos avene [] Preterea vendidit dicto Hugoni nomine quo supra juridictionem cognitionem judicium et bona delinquentium cujusque cause criminalis pretorie et directe bleriam in terris bugeriis in sexta parte ad dictum prioratum pertinente volens et concedens quod dicti Hugonis blaieriarius et cujusque domum prioratus tenentis currat pro sexta parte et omni juridi[c]tione utatur prout superius est expressum Sic insuper actum et concordatum in hoc facto et contractu inter Petrum et Hugonem quod idem Petrus non debet accipere in manso herium integro nisi unum bichetum avene et si continguat priorem prioratus predicti vel illum qui dictum prioratum pro tempore possidebit et tenebit amasiare mansum herium predictus Petrus vel ejus successores debent habere II bichetos avene et unam gallinam in quolibet manso amasiato cum corveiis supradictis Item sexta pars terrarum bougeriarum que sunt in stagnis dicti Petri ipsi Petro quiete et libere manet Item in terris quas tenet dictus Petrus et quas excolunt homines dicti Petri ad opus eorum vel ipsius Petri videlicet in bougeriis bleria et juridictio manet dicto Petro et terre quas excolunt homines dicti Petri dictis hominibus remanent et bleria juridictio cognitio et justicia dicto priori remanent quiete et libere in dictis terris in sexta parte Item in terris bougeriis quas dictus Petrus et sui homines non excolunt neque tenent dictus Petrus voluit et concessit quod bleria remaneat dicto priori pro sexta parte jurisdictio cognitio et justicia similiter Et dicto Petro pro parte sua acceptavit siquidem dictus Petrus in recompensatione XXII denariorum censualium quos habebat in manso dou Chasseinz et in manso Bernardi de Montaulon qui illos habebat et percipiat in prato de Maraus pro censsiva sua et blaieria et juridictio dicto Petro rem[ane]at in prato predicto et dicto prioratui bleiria mansi dou Chasseinz et mansi de Montaulon cum appendiciis dictorum mansorum remanent quitte et libere Item voluit ac concessit dictus Petrus quod si inveniretur aliqua alia possidere in futurum quam que superius sunt expressa in hominibus et terris ipsius prioratus quod possessio et prescriptio quantumque longa vel longissima non possint eum neque heredes seu successores suos juvare et quod pro possidente non habeatur omnia et singula supradicta prout superius sunt expressa tenenda et possidenda pariter et habenda et dicto Hugone administratore vel ejus successoribus dictum prioratum tenentibus pacifice et quiete pro ducentis libris Viennensium dicto venditori jam solutis a dicto emptore in pecunia legitime numerata promisitque dictus Petrus per stipulationem sollempnem dicto Hugoni stipulanti nomine quo supra per juramentum suum super sancta Dei euvangelia corporaliter prestitum et sub obligatione omnium bonorum suorum mobilium et immobilium presentium et futurorum ubicumque existentium omnia et singula supradicta prout superius sunt expressa ac divisa dicto Hugoni et suis successoribus dictum prioratum tenentibus tenere in pace et etiam garantire nec in predictis prout superius sunt expressa aliquid attemptare nec aliquid juris reclamare sed omnes singula supradicta firmiter et inviolabiliter observare nec contraire per se vel per alium in toto vel in parte facto vel verbo tacite vel expresse in judicio vel extra judicium nec contravenire seu contravenire volenti ullatenus consentire Nos predictus Johannes dominus Castri Vilani et Luziaci ad evitandum juris et consuetudinis volubiles laqueos et advocatorum versuciam necnon et contenciones que inter nos et heredes nostros ex una parte et dictum priorem Blanzeii aut dictum Hugonem seu tenentem et possidentem pro tempore prioratum Blanzeii ex altera ad presens vel in posterum possent oriri quia predicta domus seu prioratus cum omnibus supradictis et aliis que nu[n]cietur esse de parochiatu de Blanzi sunt et erunt in perpetuum de garda resorto et baronia nostra Luziaci et heredum seu successorum nostrorum dominorum Luziaci et quia executio cujuslibet maleficii scilicet suppendere et membrum mutilare ad nos et heredes nostros dominos Luziaci pertinet et pertinere debet in perpetuum itaque quilibet latro delinquens seu malefactor nobis vel heredibus nostris dominis de Luziaco seu mandato nostro ad Ulmum de Cruce Blanzeii ab hora tercia usque ad horam meridianam debet reddi a parte dicti prioris de Blancy vel dictum prioratum pro tempore possidentis et tenentis et quia omnia premissa que in venditione hujusmodi continentur sunt in baronia Luzia[ci] et nos et heredes nostri domini Luziaci in hominibus de Sancto Juliano du Sauvaige de Montalon de Moncello de Urbileyo dou Plesmer dou Frainoi et de Blanzeio focum et locum tenentibus et possidentibus habituris et possessuris habebimus et percipiemus in perpetuum ratione garde super quolibet manso annuatim unam gallinam et unam quartam avene ad minus et duos bichetos avene ad plus et non ultra exceptis manso dou Chassei[n]g manso Bernardi Pelicier et manso Eremburgis uxoris Guillelmi Prestre superius nominatis et quia serviens noster seu heredum nostrorum dominorum Luziaci cum quinque servientibus habet et habere debet in perpetuum semel in anno in predicto prioratu de Blanzeio in sero tantum suum convivium atque gustum nos omnia supradicta prout superius sunt expressa bona fide promittimus observare et facere observari nec contravenire seu contravenire volenti ullatenus consentire In cujus rei testimonium presentibus litteris sigillum nostrum duximus apponendum Datum anno Domini MCC septuagesimo IX mense junii