Charter Document - 02195176

Gregorius Episcopus servus servorum Dei dilecto filio Abbati Sancti Petri Cabilonensis salutem et Apostolicam benedictionem Insinuarunt nobis dilecti filii Abbas et conventus Monasterii Cluniacensis quod nonnulli clerici et laici Lingonensis Eduensis et Cabilonensis Civitatum et Diocesum qui Terras Domos prata vineas possessiones grangias et alia immobilia bona sub annuo censu seu redditu a Monasterio ipso tenent censum sive redditum hujusmodi dictis Abbati et Conventui ut tenentur exhibere non curant quanquam iidem Clerici et laici Terras vineas Domos Prata Possessiones Grangias et alia bona hujusmodi pacifice possideant et quiete ac fructus cum integritate percipiant eorumdem propter quod Abbati et conventui ac Monasterio memoratis non modicum imminet detrimentum Quare iidem Abbas et conventus nobis humiliter supplicarunt ut de opportuno sibi super hoc remedio providere paterna diligentia curaremus Quocirca discretioni tue per Apostolica scripta mandamus quatenus si est ita dictos laicos et clericos quod censum sive redditum memoratum prelibatis Abbati et conventui exhibeant integre ut tenentur monitione premissa per censuram Ecclesiasticam appellatione remota iustitia mediante compellas Testes autem qui fuerint nominati si se gratia odio vel timore subtraxerint censura simili appellatione cessante compellas veritati testimonium perhibere Datum apud Vrbem veterem VI Kalendas Octobris Pontificatus nostri anno primo