Charter Document - 02195133
| Charter Number: | 02195133 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1267 |
| Date type: | Internal, Calendar, Papal |
| Resource Link(s): |
CCE: cartae cluniacenses electronicae |
Charter:
Clemens Episcopus seruus seruorum Dei dilectis filiis Priori et Conuentui Monasterij Siluiniacensis Cluniacensis Ordinis Claromontensis Dioecesis salutem et Apostolicam benedictionem Clara sanctorum merita quibus Catholicorum Ecclesia conspectius rutilans a sui primordio felicibus profecisse et iugiter proficere noscitur incrementis a Christi fidelibus precipua reuerentia venerari et fideles ipsos ad sedulam et sollertem imitationem huiusmodi meritorum salubriter allicere cupientes libenter eos spiritualium largitione munerum recreamus quibus desideranter illecti ad immarcescibilem Sanctorum ipsorum gloriam obtinendam laudabilibus exemplis et meritis perducantur Cum itaque sicut ex vestra insinuatione accepimus propter merita gloriosa Sanctorum Consessorum Maioli et Odilonis quorum corpora in vestra Ecclesia requiescunt mirabilis Deus in sanctis suis multa quotidie miracula operetur ibidem propter que ad eandem Ecclesiam de diuersis partibus fidelium multitudine confluente corpus predicti sancti Maioli ad alium locum ipsius Ecclesie magis venerabilem et decentem intenditis cum debita veneratione transferre Nos vt dictorum fidelium deuotio spe desiderabilium premiorum erga dictam Ecclesiam augeatur et ad huiusmodi translationis corporis dicti sancti solemnia maior populorum confluat multitudo De omnipotentis Dei misericordia et beatorum Petri et Pauli Apostolorum eius authoritate confisi omnibus vere penitentibus et confessis qui ad dictam Ecclesiam in die translationis sancti eiusdem vnum annum et quadraginta dies hac vice illis autem qui illic infra octo dies immediate sequentes et in anniuersario die translationis ipsius venerabiliter et deuote accesserint centum dies de iniunctis sibi penitentiis misericorditer relaxamus Datum Viterbij II Id Martij Pontificatus nostri anno tertio