Charter Document - 02195125

Reverendo in Christo patri ac domino Dei gratia Aniciensi episcopo judici delegato a reverendo patre domino Symone tituli Sancte Cecilie presbitero cardinali Apostolice Sedis legato Bertrandus Dugerii et Willelmus Achardi Willelmus de Monflor Johannes de Cortes Willelmus de Lespinassa Amblardus et Stephanus de Chasluts monachi monasterii Mauziacensis Clarom dioc salutem cum omni reverencia et honore Noverit vestra paternitas reverenda quod in causa quam movemus seu movere intendimus auctoritate premissa coram vobis contra reverendum patrem Petrum abbatem predicti monasterii Mauziacensis Willelmum de Glenec conmonachum nostrum constituimus nostrum procuratorem dantes eidem procuratori nostro plenam ac liberam potestatem et speciale mandatum agendi petendi restitutionem respondendi petendi expensas exipiendi replicandi jurandi de calumpnia seu de veritate dicenda in animam suam et animas nostras et subeundi cujuslibet alterius generis sacramentum et faciendi omnia que nos faceremus vel facere possemus si cause predicte interessemus gratum et ratum habituri quicquid per dictum procuratorem actum fuerit in causa predicta et procuratum Et hoc vobis reverende pater et parti adverse et omnibus quorum interest per presentes significamus Et quia sigilla propria non habemus sigillo venerabilis patris domini abbatis Cluniacensis usi sumus Et nos dictus abbas Cluniacensis in testimonium omnium premissorum ad preces dictorum monachorum presentibus sigillum nostrum duximus apponendum Datum apud Montes in festo beatorum apostolorum Symonis et Jude anno Domini MCCLX sexto