Charter Document - 02195076

Quoniam nobis denunciatum extitit et denunciationis clamor [in auribus nostris sepe insonuit et] frequenter vos abbatem Mauziacensis monasterii vestre administrationis officium tam in spiritualibus quam temporalibus minus sufficienter gerere et satis remisse[] exercere idcirco vos karitative monemus ut dicte administrationis officium modo geratis et exerceatis debito circa ea specialiter que sequuntur Vos enim monemus ut in monasterio Mauziacensi singulis diebus debite divinum celebretur officium sicut decet Item vos monemus ut monachorum vestrorum confessionibus audiendis frequentem detis operam et diligentiam circa hoc adhibeatis exactam Item vos monemus ut super correctione monasteriorum vestrorum tam circa eorum excessus quam circa transgressiones regularium statutorum et alia que correctione indigere videntur ac specialiter circa ea circaque Rigaudus vester monachus dicitur diffamatus vos prout exigit officii vestri debitum exhibeatis sollicitum et attentum ac excessus et transgressiones hujusmodi puniatis prout secundum Sancti Benedicti regulam et ordinis Cluniacensis statuta fuerint punienda Item vos monemus ut in ecclesia claustro refectorio dormitorio et locis aliis Mauziacensis monasterii consuetum diligentissime faciatis silentium observari Item vos monemus ut in monasterio Mauziacensi hospitalitatis gratia diligenter servetur virum circonspectum et providum ejusdem monasterii monachum infra festum Nativitatis Domini instituentes hostalarium qui hospitibus in necessariis providere possit et debeat ut decebit quantum ad id suppetere possunt ipsius monasterii facultates Item vos monemus ut in dicto Mauziacensi monasterio elemosinarie beneficium pauperibus nullatenus subtrahatur sed diligentius solito largiatur virumque discretum et honestum de dicto monasterio infra dictum festum Nativitatis Domini instituatis elemosinarium qui elemosinarie officium debite exequatur Item vos monemus ut nullum de conventu monasterii Mauziacensis infra sectas ejusdem monasterii jacere nullatenus permittatis nisi una jaceat in dormitorio cum conventu exceptis dumtaxat debilibus et egrotis ac illis obedienciariis quorum officium merito obedientiarios extra dormitorium jacere requirit Item vos monemus ut monachos vestros tractetis et tractari faciatis fraterna in Domino karitate Item vos monemus ut quadragesimali tempore in refectorio conventui Mauziacensi in generali oleo cepo II IV et VI feria faciatis sicut aliis diebus ejusdem temporis provideri necnon alio tempore diebus quibus idem conventus sagimine non utetur Aliasque ipsi conventui secundum quod decet et sufficere possunt facultates monasterii necessaria ministretis Item vos monemus ut fratribus debilibus et egrotis in infirmaria competenter in necessariis providere curetis ita quod circa hoc nullum prorsus defectum aut penuriam patiantur Item vos monemus ut infra duos menses a tempore date presentium computandos instituatis priores viros providos et discretos de Mauziacensi monasterio ac etiam monachos in Sancti Germani de Fossatis Sancti Boneti de Denonia de Wolvico de Ternhac et de Sanacultura prioratibus ac aliis locis vobis subjectis quibus consueverunt priores institui et monachi commorari Item vos monemus ut grangiam in monasterio de Loriges ad camerariam Mauziacensis monasterii pertinentem ad statum pristinum reducatis et eam prefate camerarie cum aliis omnibus ipsius camerarie juribus sicut retroactis temporibus dicta cameraria premissa habuit deputetis Item vos monemus ut alienationes reddituum possessionum et jurium monasterii Mauziacensis et pertinentiarum suarum quas sine ejusdem monasterii conventus assensu intelleximus vos fecisse et specialiter Sancti Ambrosii de Rubiaco Sancti Petri de castro et capelle Ruppis Fortis prioratuum alienationes infra Cluniacense capitulum generale venturum proximo revocetis nec nostre intentionis existit ut per hec facta domino Claromontensi episcopo de prioratu [] concessio revocetur Item vos monemus ut precium trium marcharum argenti quas vendidisse dicimini necnon residuum illius summe pecunie quam bone memorie archiepiscopus Nichociensis monasterio Mauziacensi legavisse dicitur et dedisse in utilitatem ipsius monasterii cum ejusdem monasterii conventus consilio convertatis Item vos monemus ut nullus monachus vobis subditus duos prioratus teneat aut duarum administrationum officium habeat sive gerat Item vos monemus ut cedulas sigillo dicti conventus Mauziacensis sigillatas ut dicitur quas habetis eidem conventui infra dictum festum Nativitatis Domini reddere minime differatis Item vos monemus ab esu carnium extra domos vestras penitus abstinere ac intra domos ipsas coram personis secularibus nullatenus eis uti Item vos monemus ut frequentius solito omnibus diebus sollempnibus et maxime in quinque festis precipuis una cum dicto conventu in ecclesia divino officio intersitis sedeatis in claustro et in refectorio manducetis nisi forsan corporalis infirmitas aut alia causa legittima et evidens super hiis vos excuset Item vos monemus ut unus monachus vel plures de nocte coram vobis in camera vestra jaceat vel jaceant eo quod sic vestram condecet honestatem Item vos monemus ut coram conventu monasterii Mauziacensis aut coram decem vel duodecim majoribus de conventu semel in anno statum dicti monasterii exponatis Item vos monemus ut infra clausuram dicti monasterii Mauziacensis nullos introducatis armatos vel cum armis nisi monachi inobedientes vobis forsan vellent cum armis resistere violenter Item vos monemus ut absque conventus monasterii Mauziacensis assensu nullas prorsus de juribus et possessionibus ipsius monasterii alienationes facere attemptetis Actum in capitulo Mauziacensi XII kalendas decembris anno Domini MCCLX quarto