Charter Document - 02195033
| Charter Number: | 02195033 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1260 |
| Date type: | Internal, A.D. |
| Resource Link(s): |
CCE: cartae cluniacenses electronicae |
Charter:
Nos frater Yvo divina permissione humilis abbas Cluniacensis notum facimus universis presentes litteras inspecturis quod cum bone memorie Hugo de Vallibus precentor Lugdunensis quondam procurator et administrator generalis domus Montis Bertoudi ad monasterium Cluniacense immediate spectantis olim dedisset et concessisset nobili viro Humberto quondam domino Bellijoci et heredibus ac successoribus suis in perpetuum guardam mansorum inferius nominatorum ad dictam domum Montis Bertoudi pertinentium cum omnibus pertinentiis et juribus ipsorum mansorum et tenementariorum eorumdem videlicet mansi de Capella mansi de les Rosseres mansi del Terreuz mansi de la Baruteri mansi de les Givroneres mansi de Boteres mansi de les Avilleres mansi de Trevign mansi de les Pesteleres mansi de les Mairoleres mansi de les Aloeres mansi de les Arcouderes mansi de les Baconeres mansi de Lesches mansi de les Berencheres mansi Aloudneta mansi de Clausura mansi de les Iverneres et mansi de la Briveteri et pro dicta guarda dictus precentor de voluntate tenementariorum dictorum mansorum dedisset et concessisset dicto domino Bellijoci septem bichetos avene percipiendos et levandos in perpetuum annuatim in quolibet predictorum mansorum ita quod dominus Bellijoci de ipsis septem bychetis avene percipit quatuor bychetos et castellanus suus de Chalamont duos bichetos et cacipollus ejusdem loci unum bychetum Et processu temporis discordia mota fuisset inter nobilem virum Guichardum nunc dominum Bellijoci ex una parte et fratrem Gaufridum Viridis decanum Montis Bertoudi ex altera super hoc quod tam dictus Guichardus quam pater suus consueverunt facere et levare quandoque aliquas exactiones a tenementariis dictorum mansorum ratione dicte guarde dicto decano asserente hoc fieri non debere tandem post multas altercationes inter dictum G dominum Bellijoci et prefatum decanum de consensu et voluntate nostra super hoc compositum est amicabiliter in hunc modum videlicet quod dictus decanus pro bono pacis et concordie concessit et concedit dicto Guichardo et suis successoribus in perpetuum quod quilibet tenementarius dictorum mansorum habens duos boves ad requisitionem domini Bellijoci vel ejus mandati veniat gratis cum duobus bobus suis una die mense mayo annuatim in jornale dicti domini Bellijoci ita quod ipsa die valeat cum bobus suis redire ad domicilium suum tali modo quod dominus Bellijoci nec castellanus nec cacipollus suus de Chalamont nec aliquis alius pro eis non possit aliquid aliud petere vel exigere nec levare nomine guarde vel alia qualibet ratione a tenementariis dictorum mansorum nec in ipsis mansis nisi tantummodo dictum jornale ut predictum est cum septem bychetis avene superius nominatis Hanc autem compositionem et concordiam dictus decanus pro se et successoribus suis nobis consentientibus et volentibus promittit bona fide in perpetuum ac inviolabiliter observare et contra aliquatenus nec venire nec consentire alicui volenti contra ire Renuncians in hoc facto [] Nos vero dictus abbas supradictam compositionem et omnia predicta et singula volumus laudamus approbamus ratificamus acceptamus et confirmamus et presentem cartam sigilli nostri munimine una cum sigillo dicti decani roboramus in robur et testimonium perpetue veritatis omnium premissorum Et nos dictus frater Gaufridus decanus Montis Bertoudi confitentes vera esse omnia predicta et singula presenti carte sigillum nostrum una cum sigillo dicti domini abbatis Cluniacensis apponimus ad hujus rei evidenciam pleniorem et in testimonium veritatis Datum anno Domini MCC sexagesimo mense decembris