Charter Document - 02195031

In nomine Domini nostri Jesu Christi Anno Incarnationis ejusdem millesimo ducentesimo sexagesimo sanctissimo patre domino Alexandro papa quarto sacrosancte Romane ecclesie presidente Ludovico Dei gratia Francorum rege illustri mense novembri in festo sancti Clementis monasterio Figiacensi nuper pastoris solatio destituto reverendo patre viro religioso domino Bertrando quondam abbate ipsius ad Moysiacense monasterium canonice postulato ipsius postulatione per sanctissimum patrem dominum abbatem Cluniacensem admissa et approbata necnon et per eundem postulatum ad preceptum dicti domini Cluniacensis expresse recepta et acceptata resignatione premissa et vinculo spiritualis conjugii quod erat inter ipsum postulatum et dictum Figiacense monasterium omnino dissoluto fratribus omnibus in capitulo Figiacensi presentibus qui debuerunt voluerunt et potuerunt commode interesse invocata Spiritus Sancti gratia placuit nobis omnibus et singulis de conventu Figiacensi per viam compromissi providere dicto Figiacensi monasterio viduato et sic de communi voluntate omnium et singulorum fuerunt electi septem de ipso Figiacensi collegio fide digni videlicet fratres Poncius prior major ipsius monasterii P prior de Cardaliaco Bertrandus infirmarius Aymericus cantor Petrus cellerarius Guillelmus elemosinarius P prior de Toyraco quibus a toto conventu fuit collata potestas ut ipsi vice omnium per electionem vel postulationem providerent monasterio viduato hoc expresse acto in compromisso predicto quod personam illam quam dicti septem vel major pars eorum ex se vel ex aliis de gremio Figiacensi vel alias undecumque sibi placuerit eligendam ducerent aut etiam postulandam totus conventus sine contradictione aliqua acceptaret et reciperet in abbatem Figiacensem Et si forte persona ab eisdem electoribus electa vel postulata electioni vel postulationi de se facte nollet consentire fuit actum quod potestas predicta collata dictis electoribus non ideo expiraret immo duraret donec per electionem vel postulationem ab eis vice omnium sicut premissum est iterum faciendam cum effectu provisum fuerit de abbate monasterio Figiacensi predicto Hec autem sicut premissa sunt attendenda complenda et nunquam contraveniendum promiserunt omnes et singuli de conventu Figiacensi predicto prestito ab ipsis omnibus et singulis corporaliter juramento Electores autem superius nominati versa vice in presentia conventus juramento proprio firmaverunt quod recta consciencia Deum habentes pre oculis in electione vel postulatione predicta juste et legaliter ad honorem Dei et utilitatem et honorem monasterii Figiacensis tam in spiritualibus quam temporalibus se habebunt Et quod huic decreto fides plenior habeatur quia conventus Figiacensis sigillum commune non habet nos frater Bertrandus permissione divina abbas Moysiacensis et domini pape cappellanus ad preces dicti conventus Figiacensis et nos frater R prior Villenove qui premissis omnibus interfuimus nos etiam septem electores predicti et nos frater B decanus frater G camerarius frater P subprior monachi Figiacenses sigilla nostra instrumento presenti duximus apponenda in testimonium omnium premissorum Actum apud Figiacum in capitulo communi anno mense die predictis