Charter Document - 02195027
| Charter Number: | 02195027 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Lay |
| Charter Type(s): | Acceptance |
| Date: | 1224 |
| Date type: | Internal, A.D. |
| Resource Link(s): |
CCE: cartae cluniacenses electronicae |
Charter:
In nomine Domini amen Anno incarnationis ejusdem MCC sexagesimo mense julio ego Stephanus Bovions de Vergeyo et ego Stephanus Bovions Juvenis filius ejus milites notum facimus universis presentes litteras inspecturis quod nos provida deliberatione accepimus a viro venerabili et religioso abbate Cluniacensi in feudum perpetuum quicquid habemus in villa et finagiis de Gevreyo et quicquid in ipsa villa et ejus finagiis acquirere de cetero poterimus exceptis hiis que ego Stephanus Juvenis predictus habeo et in posterum habere debeo ex parte uxoris mee in dicta villa et ejus finagiis exceptis decimis meis vini ville predicte in finagiorum ejus pro quibus decimis accipere teneor et promitto et tenere in feudum ab abbate predicto et successoribus suis centum solidatas terre ad monetam Divionensem in villis et finagiis de Fixeio et de Broichons promitimus insuper et tenemur nos milites predicti per sacramentum nostrum pro nobis et nostris heredibus quos obligamus ad hoc prestitum corporale et sub pena quatercentum librarum Divionensium totum predictum feodum garantire dicto abbati et ejus successoribus perpetuo contra omnes et in nullo de cetero per nos vel per alios contraire verbo vel facto seu consensu vel modo alio qualicunque tenenturque heredes nostri perpetuo successive ab eodem abbate et ejus successoribus qui pro tempore fuerint abbates Cluniacenses omnia supradicta et que in dicta villa de Gevreio et ejus finagiis acquirere poterint accipere in feudum perpetuum et tenere Dictus vero abbas propter hoc nobis dedit numeravit et dedit solvit centum libras monete Viennensis de quibus nos tenemus integre pro pagatis in pecunia numerata Et nos Stephanus decanus Oscariensis Petrus de Nuiz miles Bertiotus nepos ejus et Perrinus de Arcu promittimus per sacramentum nostrum quod si quis [quod absit] veniret aliquo tempore contra feudum supradictum nos ex tunc ad requisitionem abbatis Cluniacensis apud Belnam tanquam fide jussores tenebimus personaliter ostagia nec inde recedemus quousque sit abbati Cluniacensi de quatercentum libris Divionensium integre satisfactum Et nos Stephanus Boions pater et Stephanus filius ejus Juvenis promittimus quilibet in solidum et pro toto sub obligatione bonorum nostrorum omnium presencium et futurorum et per sacramentum nostrum dictos fide jussores et quemlibet eorum super premissis indempnes penitus conservare supradicto feodo nichilominus in suo robore permanente In quorum omnium testimonium et munimen nos omnes supradicti presentibus litteris sigilla virorum venerabilium domini Mercatoris decani capelle ducis et magistri Alberici decani christianitatis Divionensis rogavimus et fecimus apponi Actum anno et mense predictis