Charter Document - 02195021
| Charter Number: | 02195021 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1260 |
| Date type: | Internal, A.D., Calendar |
| Resource Link(s): |
CCE: cartae cluniacenses electronicae |
Charter:
Alfonsus Dei gratia Romanorum rex semper augustus Castelle Tolleti Legionis Gallecie Sibille Cordube Murcie Giennii et Algarbii rex viris venerabilibus religiosis et dilectis suis abbati et conventui Cluniacensi salutem et sincere dilectionis affectum Cum monasterium vestrum et bona monasterii vestri predecessores nostri et nos qui eis successimus in honere et honore semper dilexerimus aucmentaverimus ac honoraverimus et intendamus etiam in posterum prosequi gratia et favore merito in hiis que ad deffensionem regnorum nostrorum et bonum statum spectare noscuntur vos invenire debemus promptos voluntarios et paratos hinc est quod cum vos et monasterium vestrum locum quemdam cui nomen est Sanctus Ysidorus habere noscamini in diocesi Palentina inter duo castra nostra situm que Duennas et Chenego vulgaliter appellantur qui est nobis et regnis nostris multum expediens et necessarius ita quod nos non possumus aliquatenus excusare quin locum illum debeamus per cambium vel alium modum vobis et monasterio vestro utilem ad nostrum dominium transferre ac proprietatem etiam specialem et si secus fieret in dampnum nostrum et regnorum nostrorum posset non modicum redundare sinceritatem vestram requirendam duximus et rogandam quatinus camerario de Carrione dare velitis efficaciter vestris clausis et patentibus litteris in mandatis quod ad nos omni mora postposita veniat ordinaturus et factaturus nobiscum auctoritate et nomine vestri seu abbatis et conventus cambium de loco superius nominato ad hec facienda sibi vestras procuratorias litteras efficaces per vestrum specialem nuncium transmittentes quarum auctoritate idem camerarius de loco predicto nobiscum possit loco vestri libere facere et firmare ita quod numquam de illo cambio possit aliquid dubium suboriri Super premissis autem ecce mittimus ad vos dilectum clericum et scriptorem nostrum Eximinum Petri latorem presentium qui circa predicta et singula predictorum vobis intentionem et voluntatem nostram plenius aperiet et exponet cui in omnibus supradictis et singulis indubitatam fidem volumus adhiberi Datum apud Almacanum rege per G Petri thesaurarium Hispalensem ejus notarium imperante decimo kal madii indiccione III anno Domini MCCLX Petrus Stephani scripsit