Charter Document - 02195006
| Charter Number: | 02195006 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Promise |
| Date: | 1259 |
| Date type: | Internal, A.D., Calendar |
| Resource Link(s): |
CCE: cartae cluniacenses electronicae |
Charter:
Universis presentes litteras inspecturis frater Petrus humilis abbas Mauziacensis Claromontensis diocesis salutem in Domino Jesu Christo Noverit universitas vestra quod cum dominus Alexander papa quartus decimam omnium fructuum reddituum et proventuum abbatiarum prioratuum decanatuum domorum grangiarum et aliorum locorum mediate et immediate Cluniacensi monasterio subjectorum necnon et ecclesiarum in quibus reverendus in Christo pater dominus Yvo Dei gratia abbas Cluniacensis et quelibet alie persone ejusdem ordinis jus obtinent patronatus dicto Cluniacensi monasterio concesserit usque ad triennium annuatim nos de parte ejusdem decime que nostrum Mauziacense monasterium prioratus domos et alia loca eidem Mauziacensi monasterio subjecta necnon et ecclesias in quibus jus patronatus obtinemus contingit promisimus et promittimus dicto domino abbati Cluniacensi solvere in festo Penthecostes proximo venturo quinquaginta libras Turonensium exceptione seu difficultate qualibet non obstante In cujus rei testimonium presentibus litteris sigillum nostrum duximus apponendum Datum apud Masillas IIII nonas marcii anno Domini MCCL octavo