Charter Document - 02195004

Ludovicus Dei gratia Francorum rex ballivo suo Ambianensi qui pro tempore fuerit salutem Cum dilecti nostri abbas et conventus Cluniacensis prior et conventus de Lethuno ad ipsum monasterium Cluniacense pertinentes nos instanter requisierint et rogaverint totis affectibus supplicantes ut solutionem sexcentarum librarum Turonensium in quibus tenentur dilecto nostro Guillelmo Olenensi episcopo quondam abbati Cluniacensi quamdiu vixerit in quocunque statu fuerit seu eciam dignitate eciam si episcopatui cesserit vel alium habuerit per compositionem et ordinationem nobis mediantibus habitam inter ipsos coram nobis et pro tribus milibus librarum Turonensium quas dictus Guillelmus episcopus dictis abbati et conventui Cluniacensi jam solvit et per arbitrium in nostra presencia et nobis mediantibus per dilectos nostros Radulphum Sancti Martini Turonensis et Guillelmum de Carnoto Sancti Frambaldi Silvanectensis thesaurarios prolatum annis singulis in octabis Purificationis beate Marie Parisius apud Templum pro ipsis eidem episcopo vel mandato suo fieri faceremus Et ad dictas sexcentas libras Turonensium solvendas in dicto termino annuatim de bonis prioratus sui de Lethuno et pertinenciarum et membrorum ejusdem sumptibus dicti prioratus integre et sine diminutione omni exceptione et difficultate quacumque remotis et ad penam quadraginta solidorum Turonensium solvendam singulis diebus quibus cessatum fuerit in solutione sexcentarum librarum Turonensium predictarum vel alicujus quantitatis predicte summe quantumcunque parva fuerit predictum prioratum de Lethuno cum omnibus bonis et pertinenciis et membris ipsius nobis et ipsi Guillelmo nunc Olenensi episcopo ad hec per suas litteras obligarint Voluerint eciam concesserint et rogaverint nos per suas patentes litteras quod si in solutione dictarum sexcentarum librarum Turonensium [quod absit] defecerint quod nos vel mandatum nostrum ipsos per captionem bonorum predicti prioratus sui de Lethuno et pertinenciarum et membrorum ipsius ad dictas sexcentarum librarum Turonensium et pene solutiones faciendas compelleremus vel compelli faceremus Et secundum dictum et ordinationem ac arbitrium arbitrorum predictorum remiserint et quitaverint eidem Guillelmo nunc episcopo omnia bona mobilia quecunque habet et tenet et habebit et tenebit ut eidem Guillelmo libere et absolute remaneant quamdiu vixerit in quocunque statu vel dignitate fuerit ita quod vivente dicto Guillelmo nunc episcopo ipsi per se vel per alium quacumque ratione seu indulgencia impetrata vel impetranda contra ipsum vel alium super bonis predictis ratione dicti Guillelmi nullatenus poterunt movere de cetero questionem ea vero que tempore mortis sue habebit et tenebit ad ipsum monasterium Cluniacense revertentur Et super hiis renuntiaverint specialiter et expresse omnibus juribus et actionibus defensionibus et exceptionibus sibi de jure vel de facto competentibus contra ipsum necnon litteris et privilegiis seu indulgentiis apostolicis aut aliis quibuscunque impetratis vel impetrandis per que possent predicte ordinationi obviare vel ipsum Guillelmum vel alium occasione vel ratione ipsius in aliquo molestare Et per hanc ordinationem et compositionem coram nobis factam et solutionem sexcentarum librarum Turonensium annis singulis dicto Guillelmo episcopo vel mandato suo faciendam de omnibus querelis et controversiis per sacramentum suum coram nobis corporaliter prestitum quitaverint eumdem et sibi remiserint omnimodas actiones controversias et rancores Et promiserint per sacramentum suum corporaliter prestitum coram nobis quod predicta omnia et singula fideliter et firmiter servabunt nec contravenient quoquo modo per se vel per alium in futurum supplicaverint eciam nobis ut super hiis nostras patentes litteras concederemus episcopo memorato Quia vero justum est et conveniens rationi ut ea que pro bono pacis et concordie et de communi voluntate partium juramento roborata coram nobis et mediantibus nobis acta sunt robur optineant firmitatis ad preces et instanciam abbatis et conventus Cluniacensis et prioris et conventus de Lethuno Ambianensis dyocesis predictorum volumus et concessimus eisdem quod predicta omnia et singula sine exceptione contradictione prohibitione impedimento et difficultate qualibet firmiter servari et adimpleri faceremus Unde vobis mandantes firmiter precipimus quatinus predictas sexcentas libras Turonensium annis singulis de cetero alio mandato a nobis minime expectato de reditibus dicti prioratus vel pertinenciarum suarum recipiatis et eas sumptibus dicti prioratus predicto episcopo vel ejus certo mandato sine exceptione et difficultate et prohibitione et contradictione qualibet annis singulis in octabis Purificationis beate Marie apud Templum Parisius persolvatis et ad dictam solutionem faciendam et ad penam quadraginta solidorum Turonensium solvendam singulis diebus quibus cessatum fuerit in solutione sexcentarum librarum Turonensium predictarum vel alicujus quantitatis predicte summe quantumcunque parva fuerit predictos priorem et conventum de Lethuno per captionem bonorum dicti prioratus et omnium pertinenciarum suarum et membrorum si opus fuerit compellatis Dicti autem abbas Cluniacensis et prior de Lethuno pro se et conventibus suis promiserunt et juraverunt coram nobis tactis sacrosanctis euvangeliis quod contra predicta vel eorum aliquod per se vel per alium seu alios non venient aliquo modo vel aliquo casu in futurum sed omnia et singula que presentibus litteris continentur observabunt complebunt et tenebunt semper sine exceptione contradictione prohibitione et impedimento quocunque Datum Parisius anno Domini millesimo ducentesimo quinquagesimo octavo mense februario