Charter Document - 02194954

Excellentissimo domino suo Ludovico Dei gratia primogenito illustrissimi domini nostri Ludovici Dei gratia regis Francorum et ejus consilio frater Guillelmus miseratione divina humilis abbas Cluniacensis et totus ejusdem loci conventus salutem et orationes ad Dominum pro eisdem Ad sublimitatis vestre presidium nostrum post Deum singulare refugium confugimus ut nobis in angustiis et pressuris positis per dominum ducem Burgundie et quosdam latrones raptores invasores incendiarios qui de nostris exierunt et de nostris non sunt qui dicti ducis favore auxilio nos et ecclesiam nostram in membris ejus multipliciter aggravant et molestant et ut breviter concludamus de aliqua possessione prioratu vel domo seu quacumque alia re que in ducatu Burgundie consistit et ad nos pertineat nichil omnino habere possumus nec jam per ducatum Burgundie gentes nostre ire possunt secure dominus siquidem dux Burgundie de quibusdam excommunicatis latronibus invasoribus et raptoribus facit scutum et palliationem et umbram qui nos infestant isto modo Philippus itaque quondam decanus noster Haidouinus dictus de Brancion subprior Vergiaci Stephanus Esponsart Philippus dictus Kaim Hugo de Giniaco Guillelmus de Sancto Marcello quondam de ordine Cisterciensi et quidam alii ipsorum complices monachi nostri fugitivi et ejecti a nobis consilio auxilio et favore Galteri quondam prioris Cluniacensis et Jacobi quondam prioris Martigniaci in ducatu Burgundie priorem Vergiaci a prioratu suo expulerunt nec priorem redeuntem intrare permiserunt ducis favore subnixi Priorem etiam de Monte Mirabili qui pro nostris negociis veniebat Cluniacum ceperunt familiam et eum verberantes equitaturis et rebus aliis spoliarunt Villam et ecclesiam Givriaci que proprie pertinet ad mensam conventus nostri Cluniacensis invaserunt rapuerunt vastaverunt dissipaverunt more hostili pacientia et favore ducis suffulti Voonam villam et cellarium domum de Belna de Monte Helye et pertinenci arum suarum invaserunt Prioratum et ecclesiam de Charrola cum multitudine armatorum invaserunt et que invenerunt calices et ornamenta ecclesie asportaverunt et ad ultimum incendio concremarunt et predictos prioratus villas et ecclesias per ducis potentiam usque in hunc diem detinent violenter occupata Dictus etiam Philippus et sui complices litteras nostras et sigillum nostrum falsaverunt et per quemdam nuncium apud Cluniacum miserunt pro pecunia impetranda quem servientes nostri retinuerunt et adhuc captivum detinemus et hec omnia dictus nuncius spontanea voluntate recognovit Villam insuper et ecclesiam de Paredo cum multitudine armatorum de nocte invaserunt et quia ibi prevalere non potuerunt apud Tholon perrexerunt ubi quidam scuti feri et miles quidam qui causa audiendi missam ibi perrexerant ut dicebant ecclesiam castrum cimiterium occupaverunt et duos homines ibi interfecerunt sed ad ultimum capti fuerunt scuti feri et miles predicti et eos captos detinemus Et cum per viam istam castrum de Tholon haberi non posset dominus Johannes de Miremont qui se vocat mandatum ducis Burgundie cum exercitu ducis villam et castrum de Tholon obsederunt et ceperunt et adhuc dux castrum et villam detinet violenter occupatam bona res hominum et ecclesie cepit abstulit et pecunias extorsit ab eisdem et licet requieverimus dominum ducem ter aut quater humiliter ut predicta faceret emendari et nostra nobis reddi vel liberari noluit licet dominus comes Pictavensis bis sibi preces et litteras pro hiis liberandis et sedandis duxerit destinandas et insuper vos domini regis consilium et ipse primogenitus domini regis nuncium et litteras videlicet Matheum de Compens ad ducem transmisistis sed nec littere nec nuncius nobis hactenus valuerunt Dixerat jam dudum mihi abbati dux multis audientibus Parisius quod si curia Francie sibi mandaret predicta bona nostra faceret liberari quod jam curia fecit sua gratia sed dux nichil fecit nisi pejus Dixerat etiam mihi abbati dux multis audientibus quod si prior et conventus Cluniacensis sibi scriberet quod nostra bona liberaret et faceret emendari sed pluries requisitus nichil fecit nec adhuc facit Publice etiam fecit dictus dux apud Cabilonem preco nixari in pleno foro ut dicitur quod si abbas Cluniacensis veniret apud Sanctum Marcellum Cabilonensem vel ad alia loca in ducatu quod omnes essent contra abbatem et non permitterent eum vel suos intrare Burgenses Cluniacenses vel mercatores terre abbatis non audent ire per terram ducis nec nuncii abbatis vel conventus Spoliatus fuit et captus quidam nuncius abbatis in potestate ducis Preterea vobis et omnibus facimus manifestum quod in cartis comitum Cabilonensium que apud nos sunt videlicet avi domini Johannis quondam comitis Cabilonensis et matris ipsius comitis heredum comitatus Cabilonensis domini etiam Johannis qui adhuc vivit qui dominus est de Salins inter alia capitula continentur verba ista ut breviter omnia comprehendam In villa Paredi vel terra ecclesie nullam mihi jurisdictionem vel consuetudinem exclusa omni concertatione retinui Quilibet Cabilonensium comitum sic loquitur et jurat quilibet per se servaturum cartas comitum Cabilonensium Hec eadem in carta domini regis Philipi continentur Dominus autem dux Burgundie qui nunc est postquam habuit comitatum Cabilonensem hujusmodi juramentum fecit et litteras suas patentes quas habemus in hec verba dedit nobis [] Dominus autem dux hec prout deceret non attendens dampna et injurias ac rapinas predicta nobis et membris nostris infert et inferri in suo ducatu permittit Quare vobis supplicamus humiliter et devote ut ecclesiam cimiterium villam et castrum de Tholon cum rebus et bonis nostris et hominum nostrorum ibidem inventis nobis et nostris reddi sive restitui et ipsum ac suos a talibus cessare faciatis cum nullum jus habeant in ecclesiis seu villis vel castris nostris et si forte aliquid haberent illud dicimus eum amisisse ipso facto Illa autem que dictus Philippus et sui complices excommunicati a nobis inobedientes et rebelles per favorem et potentiam dicti ducis vel aliorum in potestate ducis violenter detinent occupata videlicet prioratum Vergiaci et Voonam cum pertinentiis suis Givriacum Sarthanai Troandre prioratum de Charrol cum pertinenciis eorundem et quedam alia loca nobis reddi et liberari penitus faciatis ut tam nos quam illi qui pro nobis dicta loca et alia nostra in ducatu Burgundie debent tenere seu illi qui predicta tenebant de mandato nostro qui nobis obedientes sunt et devoti pacifica eorum possessione gaudeant et quieta dampna et injurias emendari nobis et nostris ac eciam priori de Monte Mirabili ablata et consumpta restitui faciatis universa raptores puniri omnem vim et violentiam removeri Nos autem parati sumus tam domino duci quam aliis quibuscumque personis ecclesiasticis vel mundanis quod justum fuerit in curia domini regis respondere Datum Cluniaci anno Domini MCCL tercio die veneris proxima ante Penthecosten