Charter Document - 02194948
| Charter Number: | 02194948 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Lay |
| Charter Type(s): | Recommendation |
| Date: | 1252 |
| Date type: | Internal, A.D., Calendar |
| Resource Link(s): |
CCE: cartae cluniacenses electronicae |
Charter:
Viris venerabilibus et religiosis abbati et capitulo Cluniacensi Amedei comes Sabaudie et marchio in Ytalia salutem que est in Christo Jhesu cum gloria celesti Cum religionem vestram tali ac tanta credamus discretione fulgere ut salubribus consiliis et utilibus precibus benignum semper et facilem velit assensum prebere et domus vestra de Burgeto a progenitoribus nostris fundata et sub ipsorum tuicione in bono actenus statu servata tamen propter situm loci et conditionem tenuis in facultatibus existat domunculaque de Conze eidem vicina propter vicinorum maliciam et defensorum carentiam sepe sit ad ultimam desolationem perducta et eadem vel etiam majora pericula defuncto vel amoto priore qui nunc est ipsi domui videantur inminere rogamus discretionem vestram modis omnibus et requirimus bona nihilominus consciencia consulentes quatinus unius utilitati et alterius immo vestre pocius indemnitati consulentes ita dictas domos unire studeatis ut de cetero non nisi unus prior ambabus preficiatur et unico jure utraque censeatur salvo per omnia jure vestro quod ubique volumus illesum conservare Tantum autem super hoc ad preces nostras facere curetis ut vobis ad graciarum actiones teneamur et ad benefaciendum dictis domibus sicut jam cepimus provocemur nec super hoc superiorem requirere debeamus scientes certissime quod nulla propria utilitas sed sincerus amor et karitas quam erga dictas domos et habitatores habemus ad scribendum vobis nos inducit Quid autem super hoc facietis nobis rescribere non obmittatis Datum Chilhoni anno Domini MCC quinquagesimo secundo pridie idus aprilis