Charter Document - 02194946

Si diligentius mediteris attendas ut convenit qua in regno Francie libertate hactenus ecclesie et ecclesiastice persone gavise quidve etiam ipsi regno ex hoc et ejus regibus precellentibus in tuitione ac conservatione jurium ecclesiarum a retributore bonorum omnium Domino Jesu Christo gratie benedictionis provenerit et salutis ac quanto laudum preconio dictum regnum pre cunctis commendabilius habeatur ex eo quod in ipso juris viget equitas libertas ecclesiastica defensatur et religiosarum precipue personarum ad ea prona mente promptisque desideriis sedulo te donabis ac totis affectibus et actibus habeberis studiosus que cognoveris dicti regni ecclesiis et personis ecclesiasticis profutura earumque comodum quasi proprium concupiscens utilitatem et profectum ipsarum sollicito studio promovebis Sane tuam Excellentiam credimus non latere quod Cluniacense monasterium quod inter alia monasteria regni tui nobile et predives habetur florens in spiritualibus bonorum temporalium ubertate refertum cum villa Cluniacensi castro de Lordun et aliis ipsius pertinentiis consistentibus infra cruces et metas positas circa ipsum Ecclesie Romane juris et proprietatis existit ac ea gaudet per privilegia Romanorum Pontificum libertate ut nullus mortalium imperatorum scilicet regum ducum comitum marchionum archiepiscoporum et episcoporum aut quecumque persona in idem monasterium vel ejus pertinentias potestatem aliquam possit vel audeat exercere seu possessiones terras castra vel alia bona ejus infra cruces et metas existentia supradictas auferre capere invadere vel tenere quod si quisquam presumpserit anathema sit apostolice maledictionis transfossus aculeo et excommunicationis vinculo innodatus nec possit super hoc nisi per condignam satisfactionem benedictionis ve absolutionis gratiam promereri Verum cum sicut monasterii ipsius abbate didicimus intimante eo in Anglicanis partibus de nostra licentia pro sui monasterii negotiis existente ballivus Matisconensis res ejusdem abbatis et conventus Cluniacensis et specialiter castrum de Lordun prefatum eo quod idem abbas et conventus decimam tibi non solverant per triennium ceperit et ipsa sine speciali mandato carissime in Christo filie nostre [] illustris regine Francie matris tue se dicens nullatenus redditurum castrum ipsum cum rebus ibidem inventis occupatum detineat in scandalum grande nimis et gravissimum eorumdem abbatis et monasterii detrimentum prefatam reginam per nostras litteras rogandam duximus attentius quatinus attendens quam sit tibi meritorium ad salutem utile ac honorificum regno tuo Deo placitum et acceptum ac hominibus gratiosum ut Christi famulos sancte religioni in eodem regno vacantes et loca Deo dicata ullis injuriis ab aliquibus tue jurisdictioni subjectis non permittas seu detrimentis impeti vel molestiis agitari considerans etiam quod non parum detrahitur regie dignitati si castrum ipsum vel jura dicti custodiri et defensari per te solita detineantur tuo nomine violenter quodque id plurimum tue contrarium sit saluti cum contra indulta Sedis Apostolice dinoscatur ob reverentiam divinam Apostolice Sedis et nostram castrum et res predicta liberalitate benigna mandes et facias abbati restitui memorato preces nostras eo benignitatis studio impleturus quod gaudente ecclesia se de plenitudine tue in hac parte gratie pacis et quietis donaria recepisse tibi sit meritorium apud Deum nosque provide tuam Excellentiam cumulatis laudibus et multiplicatis benedictionibus effera Dat Perusii v kalendas aprilis anno VIIII