Charter Document - 02194931
| Charter Number: | 02194931 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1250 |
| Date type: | Internal, Calendar, Papal |
| Resource Link(s): |
CCE: cartae cluniacenses electronicae |
Charter:
Innocentius Episcopus servus servorum Dei dilecto filio Archidiacono Stampensi in Ecclesia Senonensi Salutem et Apostolicam benedictionem Sua nobis dilecti filii Abbas et Conventus Monasterii Cluniacensis petitione monstrarunt quod cum eis jamdudum a Romanis Pontificibus sit indultum ut universos malefactores eorum et hominum ipsorum cujuscumque conditionis et potestatis existerent qui infra terminos immunitatis ejusdem Monasterii invasionem predam aut homicidium perpetrarent si eorum Episcopi et Ecclesiarum Prelati postquam ab ipsis Abbate et conventu forent tertio requisiti eosdem malefactores ad satisfactionem ipsis Abbati et conventui congruam exhibendam non ducerent compellendos auctoritate Apostolica candelis accensis excommunicationis et interdicti possent sententiis innodare et tamdiu ipsos nunciare publice hujusmodi sententiis irretitos donec de perpetratis excessibus eis satisfacerent competenter iidem Abbas et conventus in Guidonem de Chunteriaco Willelmum de Baldo W et universos milites et omnes alios qui cum eisdem militibus ad rapiendum quosdam Palefredos et res alias ipsius Abbatis infra immunitates predictas interfuerunt pro eo quod eorum Episcopus ex parte eorumdem Abbatis et conventus super hoc tertio requisitus predictos milites et alios ad satisfactionem ipsis de predictis excessibus congruam exhibendam non compulit cum hujusmodi excessus essent adeo notorii quod nulla poterant tergiversatione celari Excommunicationis et interdicti sententias exigente justitia promulgarunt Quocirca discretioni tue per Apostolica scripta mandamus quatinus faciens sententias ipsas prout rationabiliter sunt prolate auctoritate nostra usque ad satisfactionem condignam appellatione remota inviolabiliter observari Prefatos malefactores tamdiu excommunicatos publice nuncies ab omnibus arctius evitari donec eisdem Abbati et conventui de predictis Palefredis et Rebus aliis necnon damnis et interesse et etiam de fractione immunitatis loci predicti satisfecerint competenter Datum Lugduni Idibus Septembris Pontificatus nostri anno VIII