Charter Document - 02194930

Universis presentes litteras inspecturis Hugo dominus Berziaci castri salutem in Domino Notum facio quod cum inter religiosos viros abbatem et conventum Cluniacensem ex parte una et me ex altera coram excellentissima domina B[lancha] Dei gratia Francorum regina contentio verteretur super eo videlicet quod ego super homines Cluniacensis ecclesie de Berziaci villa de Saloniaco de Pruenges de Vienges de Buciaco de Petra Clausa de Sarreriis quasdam exactiones et consuetudines indebitas petebam et percipiebam ut dicebat idem abbas tandem de bonorum virorum consilio in Symonis de Pogniis domini regis clerici canonici Ebroicensis quem ad partes nostras domina regina propter contencionem predictam destinaverat et Balduini de Pyano ballivi Matisconensis presentia composuimus et pacem inivimus in modum inferius annotatum Ego dominus Berziaci castri et heredes mei in hominibus Cluniacensis ecclesie in predictis villis et locis habitantibus exnunc in perpetuum pro effusione sanguinis quam cum gladio perpetrari contigerit sexaginta solidos pro alia effusione sanguinis sine gladio septem solidos pro homine reo mortis corpus ad suspendendum percipiemus et habebimus et Cluniacensis ecclesia omnia mobilia et immobilia ipsius rei que in locis predictis ad Cluniacensem ecclesiam pertinentibus inveniri poterunt percipiet et habebit Et ego et heredes mei omnia bona ejusdem rei mobilia et immobilia que in terra mea invenientur habebimus et percipiemus et insuper omnimodam justiciam que oculorum avulsionem aut alterius membri meruerit mutilationem Reliqua vero omnia ad justiciam pertinentia Cluniacensi ecclesie remanebunt De corveiis dictarum villarum sic extitit ordinatum Ego dominus Berziaci et heredes mei singulis annis de quolibet homine duas corveatas habebimus unam videlicet circa Natale Domini et aliam quando nobis placuerit tali tamen modo quod homo qui cum bobus vel aliis animalibus operas suas exercet cum totidem sine aliqua augmentatione dictas faciet corveatas Si vero animalia hujusmodi non habuerit de proprio corpore vel uno homine pro se misso dictas corveatas faciet Et ego et heredes mei ipsis quando dictas corveatas facient in vite necessariis tenebimur providere De quolibet hospicio duas gallinas item avenam pro garda et panem unius denarii non de quolibet hospicio sed sicut extitit hactenus consuetum habebimus annuatim insuper viginti trossellos feni ad collum hominis de predictis villis insimul non de qualibet earumdem annuatim habebimus et viginti panellos frumenti ad mensuram Cluniacensem recipiendos et levandos per manum custodis Berziaci ville de hominibus supradictis infra festum beati Michaelis reddendos Homines autem predictos nec ego nec heredes mei adversus ecclesiam Cluniacensem in aliquo manutenebimus seu etiam defendemus tamen homines supradicti ad clamorem castri mei ad ipsum defendendum et custodiendum venire communiter tenebuntur Nulla alia penitus quam ea que superius expressa sunt ego aut heredes vel servientes mei in predictis locis seu hominibus per nos vel per alium de cetero petere poterimus seu etiam reclamare sed Cluniacensi ecclesie remanebunt exceptis Gaufredo de Moens Papino de Moens Uldrico de Moens liberis Bruneti de Moens et tenemento de Palude manso de Chenevaus et manso de Buissieres et manso de Cligie et manso Blanchet de la Balouse in quibus habebimus sicut ante compositionem istam solebamus habere Compositum siquidem extitit inter nos quod domus Berziaci ville a strata publica sicut itur per grangiam veterem versus Matisconum in circuitu domus et sicut clausum usque ad rivulum se comportat et usque ad viam veterem qua itur versus Valevi suam propriam garannam habebit in qua alicui alii preterquam familie dicte domus non licebit venari Et quociens domnum abbatem Cluniacensem et ejus successores abbates Cluniacenses ad domum suam Berziaci ville declinare contigerit ipse quamdiu ibi fuerit per totam garannam domini Berziaci venandi et venari faciendi sine contradictione aliqua habebit liberam potestatem Quia vero sigillum non habeo supradicti Symon et ballivus ad petitionem meam sua presentibus litteris apposuerunt sigilla Ceterum fuit inter nos conventum quod dominam reginam vel dominum regem cum de partibus transmarinis redierit rogabimus et requiremus ut hanc presentem pacem ratam habere dignetur et per suas litteras confirmare Actum Matiscono anno Domini millesimo CC quinquagesimo die sabbati post decollationem beati Johannis Baptiste