Charter Document - 02194894
| Charter Number: | 02194894 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1247 |
| Date type: | Internal, Papal |
| Resource Link(s): |
CCE: cartae cluniacenses electronicae |
Charter:
Innocentius Episcopus servus servorum Dei venerabili fratri Basiliensi Episcopo salutem et Apostolicam benedictionem Petitionem dilectorum filiorum Abbatis et Conventus Cluniacen audivimus continentem quod cum Prioratus de Alta Cliqua Clun Ordinis Conventualis existat et ejus ordinatio ad Abbatem ipsum pertineat pleno jure ac semper per Priorem Monachum ejusdem ordinis soleat gubernari Tu sub illo pretextu quod tibi dicebas commissum a nobis ut de jam dicto Prioratu auctoritate nostra dilecto filio B Grandivallensi preposito provideres copia rescripti Apostolici prefatis Abbati et Conventui licet eam instanter petiverint denegata Prioratum eumdem prefato preposito regendum ab ipso quoad viveret commisisti in multorum scandalum et Cluniacensis Monasterii detrimentum Cum autem intentionis nostre non fuerit quod pretextu provisionis hujusmodi Monasterium ipsum deberet taliter pregravari ac decenter utrique parti super hoc providere velimus fraternitati tue per Apostolica scripta mandamus quatinus si est ita dictum Prioratum sine dilationis ac difficultatis obstaculo Monasterio prefato restituens amoto ab ipso quolibet illicito detentore memorato preposito de beneficio Ecclesiastico quod ipsius personam deceat juxta Priorum provideas continentiam litterarum Si vero restitutio ipsa propter repugnantiam ejusdem prepositi provenire non poterit tu post susceptionem presentium spatium duorum mensium terminum peremptorium prefigas eidem quo per se vel Procuratorem idoneum compareat coram nobis exhibituris dictis Abbati et Conventui super hoc justitie complementum Diem autem citationis et formam et quicquid inde feceris nobis per tuas litteras harum seriem continentes fideliter intimare procures Datum Lugduni VII Idus Octobris Pontificatus nostri anno V