Charter Document - 02194890
| Charter Number: | 02194890 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1247 |
| Date type: | Internal, Papal |
| Resource Link(s): |
CCE: cartae cluniacenses electronicae |
Charter:
Innocentius episcopus servus servorum Dei dilecto filio abbati Cluniacensi tenenti et regenti prioratum de Caritate salutem et apostolicam benedictionem Exhibita nobis tua petitio continebat quod nonnulli Cluniacensis monasterii et prioratus Caritatensis monachi pro violenta manuum injectione in se ipsos et quidam pro detentione proprii alii autem pro denegata tibi et predecessoribus tuis obedientia seu conspirationis offensa in excommunicationis laqueum inciderunt quorum monachorum quidam divina celebraverunt officia et receperunt ordines sic ligati Quare super hiis eorum provideri saluti a nobis humiliter postulasti De tua itaque circonspectione plenam in Domino fidutiam obtinentes discretioni tue presentium auctoritate concedimus ut eosdem excommunicatos hac vice absolvas ab hujusmodi excommunicationum sententiis juxta formam ecclesie vice nostra injungens eis quod de jure fuerit injungendum et illos quorum fuerit gravis et enormis excessus mittas ad sedem apostolicam absolvendos Cum illis autem qui facti immemores vel juris ignari absolutionis benefitio non obtento receperunt ordines et divina offitia celebrarunt injuncta eis pro modo culpe penitentia competenti eaque peracta liceat tibi de misericordia que super exaltat juditio prout eorum saluti expedire videris dispensare Si vero prefati excommunicati scienter non tamen in contemptu clavium talia presumpserunt eis per biennium ab ordinum executione suspensis et imposita ipsis penitentia salutari eos postmodum si fuerint bone conversationis et vite ad gratiam dispensationis admittas proprium autem si quod habent dicti monachi et conversi in tuis facias manibus resignari in utilitatem dictorum prioratus et monasterii convertendum Datum Lugduni V idus junii pontificatus nostri anno quarto