Charter Document - 02194875

Sanctissimo in Christo patri ac domino Willermo digna Dei providentia Cluniacensis ecclesie venerabili abbati frater Fulco Dei permissione ecclesie Sancti Johannis Monasterii Novi Pictavensis Cluniacensis ordinis suus abbas humilis et devotus totusque conventus ipsius ecclesie salutem et obedientiam tam debitam quam devotam Paternitati vestre conquerendo tenore presentium facimus manifestum quod episcopus Pictavensis qui nos occasione quod sumus Cluniacensis ordinis et exempti in quantum potest persequitur opprimit et infestat eo quod ratione privilegiorum Cluniacensis monasterii nitimus prout possumus quando opus est et debemus resistere ei et suis infestationibus obviare ecclesiam nostram de Podio Beate Marie et familiam et homines nostros malitiose et indebite contra privilegia Cluniacensis ecclesie faciendo supponi interdicto hinc est quod paternitati vestre supplicamus attentius et devote quatinus super hoc si placet vestrum consilium apponentes privilegia si qua habetis ad hoc facientia nobis per latorem presentium dignemini destinare ut inde jura Cluniacensis ecclesie et nostre possimus defendere et oppressionibus ejusdem episcopi obviare Verum quia prout intelleximus mandavistis quod omnes priores prioratuum nostrorum ad generale Capitulum Cluniacense veniant et intersint paupertates eorum et oppressiones nostre ecclesie ut credimus ignorantes paternitatis vestre pietatem in visceribus Jesu Christi duximus exorandam quatinus si vobis placet parcatis in hoc eorum laboribus et expensis tum propter paupertatem eorum quorum vix suppetunt facultates ad notitiam ipsius itineris perquirendam tum propter subventionem domini pape et procurationem domini legati tum propter necessitates ecclesie nostre quam oportet de novo nostris propriis sumptibus sine alterius adjutorio et jam ipsam incepimus reficere tum propter adventum comitis Pictavensis qui modo de novo cum uxore sua et familia ad partes nostras dignoscitur accessisse et a nobis et membris nostris intendit magnam quantitatem pecunie extorquere tum propter oppressionem comitis Augi quam necesse habuimus hoc in anno presenti magna pecunie summa redimere ut magni proventus nostri et quasi majores quos penitus distruebat et dissipabat possent nobis libere remanere tum propter oppressiones aliorum nobilium quas prolixum esset et longum nimium enarrare tum quia eodem tempore quo Cluniacense capitulum debet et consuevit nostrum capitulum celebrari et computationes et rationes inter nos et priores nostros fieri et tractari tum propter alia multa negotia non expressa que vobis per latorem presentium duximus declaranda Super quibus omnibus paternitatis vestre pietatem deprecamur affectu quo possumus ampliori quatinus illi vestre ecclesie misericorditer parcere dignemini que semper sub omni jugo obedientie ecclesie Cluniacensi intendit et studuit deservire Feliciter et diu valeat paternitas vestra in Domino Datum die veneris ante Letare Jerusalem anno Domini MCC quadragesimo quinto