Charter Document - 02194874
| Charter Number: | 02194874 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1246 |
| Date type: | Internal, A.D. |
| Resource Link(s): |
CCE: cartae cluniacenses electronicae |
Charter:
Nos Hugo Dei gratia Claromontensis episcopus notum facimus universis presentes litteras inspecturis quod cum ad venerabilem patrem Guillelmum Dei gratia Cluniacensem abbatem religiosi viri decanus et infirmarius Figiacensis et prior Gardeliaci accessissent eidem ex parte prioris et conventus Figiacensis ecclesie humiliter supplicarunt ut fratri Aldemaro monacho quem unanimiter sibi elegerant in abbatem confirmationis munus impendere dignaretur eidem formam electionis facte et conventus super hiis litteras presentantes Predictus vero abbas Cluniacensis ex suo officio volens agnoscere utrum in hiis canonice processissent invenit memoratum conventum Figiacensem pro eo quod decimam istius anni quam dominus papa eidem Cluniacensi abbati a toto Cluniacensi ordine persolvendam concesserat termino statuto non solverant excommunicationis sententiam incurrisse Quare idem abbas Cluniacensis habito super hoc diligenti consilio electionem hujusmodi reprobavit et cassavit utpote ab excommunicatis celebratam Qui Figiacenses monachi tam pro se quam pro conventu Figiacensi petierunt et obtinuerunt absolutionis beneficium ab eodem recepta prius satisfactione de decima pro qua erant excommunicati Quia vero memorata Figiacensis ecclesia in medio prave et perverse nationis dinoscitur esse sita et multis debitis et gravaminibus est oppressa dictus abbas Cluniacensis diligenter considerans quod mora posset dicte Figiacensi ecclesie periculum non modicum generare eidem volens paterna sollicitudine providere Deum habens pre oculis de Aldemaro Cluniacensi monacho viro utique religioso provido et honesto dicte duxit Figiacensi ecclesie providendum ipsum in dicta Figiacensi ecclesia instituens in abbatem Qui Aldemarus eidem abbati Cluniacensi obedientiam fecit manualem et in nostra presentia repromisit Acta sunt hec apud Silviniacum nobis presentibus Et ad instantiam parcium videlicet abbatis Cluniacensis et predictorum monachorum Figiacensium omnibus supradictis interfuimus ac presentibus litteris sigillum nostrum apposuimus in testimonium veritatis Datum anno Domini millesimo ducentesimo quadragesimo quinto mense januario Ego Jacobus prior Marcigniacensis interfui et subscripsi + Ego frater Aymo interfui et subscripsi + Ego Johannes archidiaconus Cluniacensis interfui et subscripsi + Ego frater Henricus interfui et subscripsi + Ego frater Wuillelmus conestabulus interfui et subscripsi Ego Villelmus Cebaziaci canonicus Claromontensis interfui et subscripsi + Ego Martinus capellanus domini episcopi Claromontensis interfui et subscripsi +