Charter Document - 02194857

In nomine Patris et Filii et Spiritus Sancti Amen Anno Domini MCCXL quinto in octabis Sancti Martini frater Guido de Belna et frater Dalmacius visitatores ex parte Cluniacensis ordinis venerunt apud Sanctum Orientium Exiensis et facta inquisitione invenerunt ibi quedam correctione digna que preceperunt sub pena excommunicationis emendari ordinantes quod monachi soli morantes extra domum ad claustrum revocentur ut vestiarium taliter a priore ordinetur quod monachi possint habere ex eo vestes necessarias prout consueverunt habere in ordine ut infirmis provideatur a priore ut sic omnis materia habendi proprium ab eis penitus amputetur precipimus ut omnes proprietates reddant priori ut a carnibus secundum quod regula precipit abstineant exceptis debilioribus et infirmis ut silentium in monasterio claustro refectorio custodiatur et qui fregerit crastina die sedeat in terra et verberetur ut omnes habeant regularia vestimenta nec aliquis utatur camisia Et hec precipimus emendari usque ad Natale Domini Ut nullus monachus nudus jaceat Quod qui fecerit crastina die jejunet in pane et aqua Precipimus ut prior tectum dormitorii et refectorii faciat reparari Garsiam Resmundum Bernardum juvenem invenimus diffamatos de incontinentia Et ideo precipimus ut eant apud Cluniacum penam quam promeruerint recepturi sed quia prior loci pro eis bonum perhibuit testimonium volumus quod usque ad Capitulum possit eos in domo retinere ita quod si bene se correxerint et honeste se habuerint prior usque ad adventum subsequentium visitatorum possit eos retinere ut sic de eis plenam probationem habeat ad perhibendum testimonium pro eis vel contra eos Si vero aliter se habuerint precipimus priori quod in Capitulo generali nobis denuntiet nec eis extunc nisi venerint ad Capitulum in aliquo provideatur sed tanquam excommunicati habeantur et evitentur De Vitali sacrista Centulo Johanne de Farrance et de Bernardo de Parrufe quedam sinistra audivimus sed quia ad plenum non possumus certificari nolumus ad presens animadvertere in ipsos sed monuimus eos ut cautius se habeant quantum ad honestatem corporis Quod nisi fecerint volumus quod sequentibus visitatoribus ostendatur Bernardo de Parrufe inhibemus precise ne de cetero frequentet domum cujusdam mulieris que dicitur filia sua Quod si fecerit ea die qua intraverit vel cum ea locutus fuerit coram aliquibus jejunet in pane et aqua Et similem penam ponimus in eis qui viderint et non manifestaverint Qui vero sibi ministraverit aliud ipso facto sit suspensus ab officio suo Thomam precipimus venire in claustrum nec volumus quod de cetero mittatur in predicationem Hec autem precipimus districte observari precipientes priori cui presens scriptum dimisimus sub pena excommunicationis ut in adventu subsequentium visitatorum proferat illud in medio etiam non requisitus vel si ipsum absentare contingeret meliori persone traderet sub predicto modo ut si [quod absit] contra presens statutum aliquid factum fuerit per ipsos secundum Deum regulariter corrigatur Hec autem promisit dictus prior bona fide facere et super hoc nobis suas litteras tribuit cum sigillo